Inatsisartut ullumi: Aningaasanut inatsit
Inatsisartut ualeru ataatsimiinneranni 2005-mut aningaasanut inatsissaq aappassaaneerneqassaaq. Tassanilu apeqqutit inuiaqatigiit aaqqissuussaanerannut pingaaruteqarluinnartut ilaatigut oqaluuserineqassapput, soorlu innaallagissap erngup kiassarnerullu akiisa assigiikkunnaarnissaat.
Aningaasanut Inatsisissaq aappassaaneerlugu inatsisartuni ullumi oqaluuserineqassaaq, tassungalu atatillugu innaallagissap erngup kiassarnerullu akiisa ukiortaaamiit assigiikunnaarsinneqarnissaat oqaluuserineqassaaq.
Akit assigiikunnaarsinneqarnissaannut Inatsisartuni amerlanerussuteqarluartut isumaqataapput, Siumut Inuit Ataqatigiit Demokraatillu akuersaarniarnertik saqqummiutereerpaat. Akit assigiikkunnaarnerisa ilaatigut suliffissuit tunisassiornerannut iluaqutaanissaa akuersaarnermut tunngavigineqarluni.
Akinik assigiissitsiunnaarnissamut Atassutikkut Kattusseqatigiillu akerliunissartik aalajangiussimavaat, naak ukiuni tulliuttuni tallimani ikaarsaariarnermi 450 millioni koruunit oqilisaatissatut Naalakkersuisunit qulakkeerniarneqaraluartut.
Akit assigiikkunnaarnissaata inuiaqatigiinnut sunniutissaat pillugit paasisat Atassutikkunnit annikippallaarsorineqarput, taamaattumillu akit assigiikkunnaarsinneqarnissaata ukiumik ataatsimik kinguartinneqarnissaa siunnersuutigaat. Akit assigiikunnaarnissaata aappassaaneerneqarnissaa sioqqullugu Aningaasaqarnermut Ataatsimiitsitaliamit isummerfigineqarpoq.
Ataatsimiititaliami amerlanerussuteqartut, Siumut, Inuit Ataqatigiit Demokraatillu naalakkersuisunit siunnersuutigineqartup piviusunngortinneqarnissaa kaammattuutigaat, taamaattorli akissarsiakinnerit utoqqaallu eqqarsaatigalugit akit assigiikkunnaarsinneqarnissaata kingunissai pillugit naliliinermik sukumiisumik, Naalakkersuisut aappaagu 2006-mi ukiakkut Inatsisartut ataatsimiinnissaanni saqqummiinissaat, Aningaasaqarnermut Ataatsimiititaliamit kissaatigineqarpoq.
Akit assigiit atorunnaarsinneqarnissaannut atatillugu pissutsit suli nalorniffiusutut nalilerlugit Aningaasaqarnermut Ataatsimiititaliap kissaatigaa Naalakkersuisut erseqqissumik paasissutissiinissaat.
