Inatsisartut ukiuunerani ataatsimiinnerat ammarpoq

Inatsisartut ataatsimiinnerannik aammaasuuvoq Inatsisartut siulittaasuata tullia Agathe Fontain, Inatsisartut siulittaasuat Jonathan Motzfeldt peqquteqarluni ammaasinnaanngitsoq sinnerlugu. Ammaasoqareermat ataatsimiinnermi immikkoortut aappaat tikinneqarpoq tassalu Naalakkersuisut siulittaasuata Hans Enoksen oqalugiaataa.

Hans Enoksen akunnerup missaanik sivisussuseqartumik oqalugiarpoq, oqalugiarnerminilu inuiaqatigiinni susassaqarfiit tamat tikikkai oqaatigineqasinnaavoq. Oqalugiarneq aallarnerneqarpoq inuiattut inuttullu ataasiakkaatut misigissutsitsinnut tunngasunik, tassa naalakkersuisut siulittaasuat inuiaqatigiinnut tinnersaateqarlunilu oqaaqqissaaruteqarpoq, allat iluuseqarnissaannut utaqqiinnarnata uagutsinnut piumaffiginerusariaqalersugut. Enoksenip tikkuarpaa inuiaqatigiinni immitsinnut ukiut kingulliit ingerlanerini malunnartumik susassareqatigiikkunnaariartorsimasugut, tamannalu attatinnassagutsigu immitsinnut artukkissasugut tikkuaavoq.

Tamatuma saniatigut naalakkersuisut siulittaasuata inuiaqatigiit akunnitsinni ataqqeqatigiinnerulluta pissuseqalertariaqarnerput oqaaqqissaarutigaa.

Naalakkersuisut siulittaasuata oqalugiarnermini inuiaqatigiinni susassaqarfiit tamangajaasa tikippai, meeqqat inuusuttullu atugaat, inissaqarniarneq, sanaartugassat iluarsartuussinissat, inuussutissarsiutit assigiinngitsut soorlu piniartuuneq aalisartuunerlu, angallanneq nukissiuuteqarneq, allaffissorneq namminersulernissamut suliniarneq kommuninillu aaqqissuusseqqinnissaq.