Inatsisartut ukiaanerani ataatsimiinnissaat aallartippoq

Namminersornerup nunatsinnut eqqunniarneqarnerani aqqusaagassat tamarmik iluatsilluariarpata 2009-mi juunip 21-anni inuiattut ullorsiornitsinni Namminersornerup nunatsinni atuutilernissaa, naalakkersuisut siulittaasuata Hans Enoksenip oqaatigaa.

Tassunga atatillugu Kalaallit Nunaanni innuttaasut namminersulernissaq pillugu aappaagu 2008-p naajartornerani taasitinneqarnissaat taavaa.

Namminersorneq pillugu isumalioqatigiissitap isumaliutissiissutaata piffissami qaninnermi naammassineqarnissaa naalakkersuisunullu tunniunneqarnissaa, naalakkkersuisut naatsorsuutigigaat Hans Enoksenimit oqaatigineqarpoq.

Naligiinneq ataqqeqatigiinnerlu naalagaaffeqatigiinnermi tunaartarineqassasut naalakkersuisut siulittaasuata oqaatigaa.

Namminersorneq pillugu isumalioqatigiissitap isumaliutissiissutaa naalakkersuisunut tunniunneqareerpat aamma aappaagu 2008-mi apriilip arfineq pingajuanni kommunerujussuanngortussani kommunalbestyrelsinngorumaartussanut qinersisoqareerpat namminersorneq pillugu isumaliutissiissut pillugu paasisitsiniaaneq aallartinneqassasoq naalakkersuisut pilersaarutigaat. Tassa tv-kkut, radiukkut, nittartakkatigut naqitatigullu innuttaasunut paasisitsiniaaneq ingerlanneqassaaq.

Ammaalluni oqalugiaammi qulequttat pingaarutillit allat aamma sammineqarput. Uani pingaarnertut taaneqarsinnaavoq kommunit kattussuunneqarnissaat.

Aalisarnermut inatsisisssaq aamma taaneqarpoq. Inuussutissarsiutit nutaat periarfissaalluartutut taaneqarput, matumani aatsitassarsiorneq pingaarutilittut taakkartorneqarluni.

Inuussutissarsiutit siuarsarneqartuassappata ilinniagaqarneq pingaaruteqarpoq, Hans Enoksen oqarpoq, ilinniagaqarusussutsillu qaffassarneqarnissaata anguniarneqarnissaa oqariartuutigalugu.

Qulequttat tamakkua allallu taaneqarput unnugulu radioaviisimi itinerusumik sammineqarumaarput.