Inatsisartut ukiaanerani ataatsimiinnertik ullumi aallartissavaat

- Ukiakkut ataatsimiinneq ataatsimiinnernit tamanit pingaarnersaasarpoq, tassami naalkkersuinikkut najoqqutassat, aappaagumut aningaasanut inatsisissakkut aalajangersarneqartarmata. Ataatsimiinnerlu naammassitinnagu tamakku akuersissutigineqartussaapput. Ullumikkullu ataatsimiinnerup ammarneqarnera pisarnertut pisussaavoq.
septembarip 13-at 2013 04:54

Inatsisartuni ilaasortat 31-usut aamma Namminersorlutik Oqartussani atorfillit qulliunerusut assuarlutik Hans Egedep Illuani ullaakkut kaffisoqatigeeqqaassapput. Tassanngaanniit nalunaaqutaq qulinngulerpat "Annaassisitta Oqaluffia"-ta tungaanut ingerlaaqatigiissapput, naalagiaqatigiinnermilu biskop Sofie Petersen oqaluussissalluni.

Ingerlaaqatigiinneq nangillugu oqaluffimmiit Inatsisartut ataatsimiittarfiannukassapput. Tassanilu Inatsisartut Ukiuat aallarnerlugu nalunaaqutaq aqqanermut sianeq sianissaaq. Inatsisartut siulittaasussaminnik qinersissapput, naalakkersuinikkullu katitigaanerat najoqqutaralugu maanna siulittaasuusoq Lars-Emil Johansen qinigaasussaassaaq.

Naalakkersuisut siulittaasuat Aleqa Hammond tamatuma kingorna ammaalluni oqalugiassaaq. Oqalugiaammilu tassani pisarnertut Nunatta qanoq inissisimanera aamma naalakkersuinikkut aalajangiussassat Naalakkersuisunit ukiup ingerlanerani piviusunngortinniarneqartut oqalugiaatigineqassallutik.

Inatsisartut nalinginnaasumik ataatsimiinnerat ulloq siulleq sapaatip akunnerata tulliani marlunngorpat pissaaq, tassani Aleqa Hammondip ammaalluni oqalugiaataa oqallisigineqassammat.

Ukiakkut ataatsinmiinneq ukiormanna sapaatit akunnerinik qulingiluanik sivisussuseqassaaq, pilersaarutillu naapertorlugit novembarip 15-ianni naammassissalluni. Oqaluuserisassat 54-it Inatsisartunit ilaasortanit siunnersuutaapput, Naalakkersuisullu oqaluuserisassanik 31-nik siunnersuuteqarlutik. Taakkununnga ilaallutik inatsisissatut siunnersuutit nutaat, nalunaarusiallu assigiinngitsut.