Inatsisartut sulinertik nangippaat

Nal. 11.46 nutartigaq

Taamaalillunilu soqutiginartunik arlalinnik oqaluuserisassaqalerpoq. Ullorli akunnermik apeqqarissaarfimmik aallartissaaq.

Inuussutissarsiornermut aatsitassarsiornermullu naalakkersuisoq, Ove Karl Berthelsen, Inatsisartunut ilaasortanit nalunaaqutaq aqqanermiit ullup-qeqqata tungaanut apeqqarissaarfigineqassaaq.

Inatsisartut nalunaaqutaq ataatsinut katersuuteqqikkunik ullormut oqaluuserisassat sammissavaat.

Kommunit aqunneqarnerat pillugu inatsisissaq pingaarnerpaassagunarpoq. Naalakkersuisut tassani ilaatigut siunnersuutigaat, kommunit nakkutigineqarnerat sukaterneqassasoq, ilaatigut kommuninik nakkutilliisoqarfiup siulittaasuata inatsisilerituutut ilinniarsimasuunissaa siunnersuutiginiarneqarluni.

Tamatuma saniatigut siunnersuutit makkua oqaluuserineqassapput:

Malik Berthelsen Siumut, isumaqarpoq ussassaarutit atuisunullu allakkatigut nalunaarutigineqartartut tamarmik qallunaatuuinnaanatik aamma kalaallisuujussasut. Naaja Nathanielsen, Inuit Ataqatigiit, isumaqarpoq, angutit arnallu nakuuserniartartut katsorsarneqarnissamut neqeroorfigineqarsinnaalertariaqartut. Atassut aamma isumaqarpoq, ujaqqanik erlinnartunik ujaasinermi siunnersuineq pingaartinneqarnerusariaqartoq.

Qimmit qimuttut pillugit inatsit aamma oqaluusereqqinneqassaaq.