Inatsisartut suliassat angisuut marluk oqallisigissanngilaat
Inatsisartut ukiaanerani ataatsimiinnissaat septembarip 22-ani aallartippat suliassat angisuut marluk oqallisigineqassanngillat.
Nuna tamakkerlugu pilersaarusiaq, Naalakkersuisut politikikkut suliaasa qanoq ataqatigiinnerannik nassuiaasoq, Inatsisartut ukiaanerani ataatsimiinnerminni oqallisigissanngilaat.
Taanna aningaasaqarnermut naalakkersuisuujunnaartumit, Demokraatineersumit Randi Vestergaard Evaldsenimit, siorna saqqummiunneqarnissaanik ulloq ataasiinnanngortorlu unitsinneqarpoq.
Nassuiaammimi siunnersuutigineqarmat nunaqarfiit qanoq ingerlalluartiginerat apeqqutaallutik aningaasalersorneqassasut akerleriissutigineqaqaaq.
Ukioq manna saqqummiunneqarnissaa neriorsuutigineqartoq
Kalaallisut qallunaatullu oqaatsit atorneqartut ilaatigut tulluarpallaarsimannginnerat pissutaalluni oqaluuserisassatut saqqummiunneqarsinnaanngitsoq, Naalakkersuisut siulittaasuata, Kim Kielsenip, Qanoruumut taamani oqaatigaa.
Nuna tamakkerlugu pilersaarusiap nutaap 2017-imi saqqummiunneqarnissaa naatsorsuutigineqassasoq, taassuma neriorsuutigaa.
Kisianni nuna tamakkerlugu pilersaarusiassatut siunnersuummik oqaluuserisassaniittoqanngilaq.
Oqaluuserineqalinngitsoq angisooq alla tassaavoq pisortat ingerlatsinerat pillugu paasisaqarsinnaatitaaneq pillugu inatsit.
Pisortat ingerlatsinerat pillugu paasisaqarsinnaatitaaneq pillugu danskit inatsisaanni, danskit oqartussaasut nunatsinnut tunngasunik suliaannik susassaqarfiini tamat allagaatinik takunnikkumagaangata ministerit allagaatit ilaannik isertuussisinnaatitanerat allannguinissamik pineqarpoq.
Kalaallisut nutsernera ajormat tunuartinneqartoq
Siunnersuut Inatsisartut ataatsimiinnerannit arlaleriarlugu tunuartinneqareerpoq, siullermik inatsit Nunatsinni tamanut ammasumik tusarniaassutigineqarsimanngimmat siorna tunuartinneqarpoq.
Aappassaanilu siunnersuutip, Naalakkersuisut naapertorlugit, kalaallisut nutserneqarnera kukkuneqarmat upernaaq manna tunuartinneqarpoq.
Inatsisartulli ukiakkut ataatsimiinnissaminni oqallisigisassaat maanna piareerput inatsillu taanna oqaluuserisassani ilaanngilaq.
Aalisarnermut inatsisissatut siunnersuut, Naalakkersuisut Inatsisartut ukiakkut ataatsimiinneranni suliassatut ilimasaarutertik, Inatsisartunut suli nassiunneqarsimanngilaq.
Siullermeerneqassaarli novembarip 16-ani, kisianni upernaaru aatsaat aappassaaneerneqarlunilu pingajussaaneerneqassaaq.
Siunnersuut ukiakkut ataatsimiinnissamut suliassanngorlugu saqqummiunneqassasoq, tusarniaanerup nassuiaataani allassimavoq.
Kingusinnerpaamik septembarip 18-iani tusarniaassutigineqassaaq, tassa siullermeerneqarnissaa qaammataannanngortorlu.
