Inatsisartut suleriaasiat nutarterniarpaa

Oqalliseriaaseq eqaannerusoq sukkanerusorlu anguniarlugu, oqallinnerup nalaani Inatsisartunut ilaasortat oqaluttarfiliaqqaarnatik issiavimminninngaanniit oqaaseqarsinnaanissaat ilaatigut periarfissinniarneqarpoq.

Tamatuma saniatigut Inatsisartuni ilaasortat issiavimminniit naalakkersuisunut ilaasortanut apeqquteqarsinnaanissaat ammaanniarneqarpoq.

Atortorissaarutitigut aamma nutarterisoqaleruttorpoq. Tassa ilaasortat nikuillutik ullumikkut taasisarnerat atorunnaarlugu issiavimminniit toortagannguaq tuuginnarlugu taasisinnaanngortinniarneqarmata.

Inatsisartut ataatsimiinnerisa toqqaannartumik Internet-ikkut immaqalu tv-kkut aallakaatinneqartalernissaat pilersaarutaavortaaq.

Suliassat amerliartuinnarnerisa kingunerannik Inatsisartut ataatsimiinnerisa sivisunerunissaat siunnerfigineqarpoq, imaluunniit ataatsimiinnerit akornanni ataatsimiititaliat sulinerat sukumiinnerulersinniarneqarpoq.

Siunnersuut amerlanerussuteqartunit tapersersorneqassappat upernaaru ataatsimiinnermi akuersissutigineqarsinnaassaaq.