Inatsisartut sivisunerusumik ataatsimiittalernissaat kissaatigaa
- Ataatsimiinnerit sivitsorneqarnissaat isumaqatigiissutigineqartuuppat, taava imaassinnaavoq ilaanni sapaatip akunneqartoq inatsisartut ataatsimiitarfimmiinngivillutik suliaminnik allanik ingerlatsisut. Taanna pilerinartorujussuuvoq, Inatsisartut siulittaasuat, Josef Tuusi Motzfeldt taama oqarpoq.
Ataatsimiinnerni Inatsisartut naliginnaasumik sapaatip akunneranut pingasoriarlutik naapittarput, taamaattorli inatsisartut tamatigut piareersarluarnissaminnut piffissaqartarnerat, Josef Tuusi Motzfeldtip qularaa:
- Assersuutigalugu nalunaarusiat ilaatigut inatsisartunut ilaasortatut ilisimasariaqakkagut innuttaasunut kalerriuttussaagatsigit honnorujunik arlalinnik quppernillit. Ilumut inatsisartunut ilaasortat tamarmik ilisimasaqarfigisarnerpaat. Taanna qularnarpoq. Taama ataatsimiinnerit eqikkagaatigisut, tamavitta atuagassanik naammattunik atuarsinnaanissatsinnut piffissaqannginnatta sivisunerusunngortinnissaa takorloorsinnaavara.
Assersuutigalugu immaqa februaarip aallaqqaataaninngaanniit maaji ilanngullugu. Taava ukiakkut septemberip aallaqqaataaninngaanniit novemberi ilanngullugu.
Taamatullu iliorneq inatsisartunut periarfissiinerussasoq, inatsisartut siulittaasuat isumaqarpoq.
- Taamaalilluni inatsisartunut ilaasortat, ataatsimiinnerit amerlinngikkaluarlugit, kisianni sulinerminni sukumiinerusumik ingerlatsisinnaanerminnik periarfissinneqassagaluarput, Josef Motzfeldt oqarpoq.
Inatsisartunulli ilaasortat illoqarfinnit allaneersut eqqarsaatigalugit ataatsimiinnerit taamatut aaqqissuunnissaat piviusunngortikkuminaatsinneqartartoq, Josef Motzfeldtip oqaatigaa.
Taamaakkaluartorli qinerseqqittoqartinnagu ataatsimeeriaatsip allanngornissaa neriuutigaa:
- Siulittaasoqarfimmi taanna eqqartortuakkatta ilagivaat. Taamaalluta ilusilissavarput. Naatsorsuutigerusukkaluarpara, qinigaaffiup uuma ingerlanerani Inatsisartut ataatsimeeriaasaat tamatsinnut naammaginartoq nassaariumaassagipput, Josef Motzfeldt oqarpoq.
