Inatsisartut siulittaasuat: Ulappuppugut, angusagulli naammaginarput

Inatsisartut upernaakkut ataatsimiinnertik piffissaq eqqorlugu naammassivaat. Inatsisartut siulittaasuat, Jonathan Motzfeldt, nalunaaqutaq sisamanut tamanut qujavoq aasarsiorluarnissamillu kissaassilluni.

- Tamatta ulapinnikuuvugut. Sorpassuilli naammaginartumik naammassivagut, Jonathan Motzfeldt siulittaasup issiavianiit oqarpoq.

Pisoqarfiusimaneralu miserratissaanngilaq. Ataatsimiinneq pingasunik naalakkersuisooqatigiinnik peqataatitaqarluni aallartippoq, marluinnarnilli naalakkersuisooqatigeeqarluni naammassilluni – tassa IA anisitaammat.

Inatsisartut ataatsimiinnerat ilaasortassanik sinniisussanillu taasinermik naggaserneqarpoq.

Kattusseqatigiit Partiiata Esmar Bergstrømillu suleqatiginissaat IA-p toqqarpaa.

Taamaalilluni siusinnerusukkut illuatungiliuttuusimasoq ataatsimiititaliami marlunnik ilaasortaatitaqalerpoq. Juliane Henningsen Naalagaaffiit Peqatigiit ataatsimeersuarnissaanni taamaalilluni aamma peqataasussanngorpoq.

Inatsisartut ukiaanerani ataatsimiinnerat tallimanngornermi septembarip ulluisa 21-anni aallartissaaq.