Inatsisartut sinniisuinik aggersaasoqanngilaq
Inatsisartut ullumi ataatsimiinneranni Kattusseqatigiit peqataatitaqanngitsoorput.
Kattusseqatigiit ilaasortaatitaat Anthon Frederiksen nalinginnaasumik ataatsimeeqataasaraluarpoq, borgmesteritulli sulinini pillugu Inatsisartuni ataatsimeeqataasinnaanani nalunaarsimavoq. Taamaattoqartillugu sinniisut aggersarneqartarput, taasisuisa amerlassusaat malillugit tulleriiaarneqartarlutik. Anthon Frederiksenilli sinniisua siulleq tullialu partiinut nuussimapput, Mads Peter Grønvold Demokraatinut nuussimalluni Lars Erik Gabrielsenilu Siumumut nuussimalluni. Taamaariarmat taakku qaangiinnarlugit Anthon Frederiksenip sinniisumi pingajuata Kattusseqatigiinneersup Villy Olsvigip aggersarneqarnissaa kissaatigisimavaa. Villy Olsvigili sivikitsuinnarmik issiareerluni Inatsisartuni ataatsimeeqataajunnaarpoq, Anthon Frederiksen Inatsisartut siulittaasoqarfianut uppernarsaammik periusaasartut malillugit tunniussisimanngimmat. Sinniisussat partiinut nuussimanerat pissutigalugu partiit tunuliaqutigilersimasaat allamik aggersaasoqalerneranik akuersitinneqaqqaartussaagaluarput, matumanilu taamaaliortoqarsimanani. Taamaattumik Anthon Frederiksenip sinniisoqarnissani kissaatigisimanngilaa, tamannalu Inatsisartut siulittaasoqarfiata akuerisimavaa. Aamma Siumumeersoq Otto Jeremiassen ataatsimeeqataanngilaq, Kangaatsiami borgmesterinngoqqinnini pillugu takkunnissaminut piffissaarussimagami. Taanna aamma sinniisumik aggersaanissanut qujaannarsimavoq, sinniisui tamarmik Atassummeersuummata. Otto Jeremiassen Atassummit Siumumut qinersiviup ingerlanerani nuuppoq.
Inatsisartut siulittaasoqarfiata aatsaavissuaq isummerfigisussaasimavaa, ilaasortanik partiinut allanut nuuttoqartillugu sinniisussaqarsinnaatitaaneq pigiinnarneqarsinnaasoq.
