Inatsisartut saniatigut suliffillit amerlapput

Inatsisartuni ilaasortat marluk tassaasut Malik Berthelsen Siumumeersoq kiisalu Naaja Nathanielsen Inuit Ataqatigiinneersoq, isumaqarput Inatsisartunut ilaasortaanermi saniatigut allamik suliffeqartarneq inatsisartunut sulinermut tunniusimanissamut killilersuisoq.

- IA-miit isumaqarpugut Inatsisartutut sulineq ullup affaanaannik suliffiunngitsoq. Isumaqarpugut Inatsisartutut sulineq ulloq naallugu suliffiusoq. Inatsisartuunerup saniatigut ulloq naallugu suliffeqaraanni, isumaqarpugut Inatsisartutut tunniusimavilluni sulisoqarsinnaanngitsoq. Tassami inatsisartutut ilaasortaaneq suliassartaqaqaaq sulilu suliassat aamma annertusiartorlutik, Naaja Nathanielsen IA sinnerlugu inatsisartuni ilaasortaq oqarpoq.

Siumut sinnerlugu Inatsisartuni ilaasortaq Malik Berthelsen Inatsisartutut suli qinigaanngikkallarami namminersortutut ingerlatsisimavoq. Inatsisartutullu qinigaareerami, Namminersortutut ingerlatsinini eqqarsarnartoqartilersimallugu.

- Inatsisartutut qinigaagama suliffeqarfiit ingerlatakka attartortilerpakka. Ajoraluartumik suliffeqarfiutima aappaata attartorneqarunnaarnera pissutaalluni suliffeqarfik ingerlateqqilernikuuara. Qinigaanera pimoorukkusullugu, saniatigut suliffeqarfimmik ingerlataqarusunngikkaluarpunga, Malik Berthelsen oqarpoq.

Naaja Nathanielsen tarnip pissusaanik immikkut ilinniarsimasoq Malik Berthelsennituulli aamma aalajangertariaqarsimavoq.

- Inatsisartutut qinigaaganga ulloq naallugu suliffeqarpunga, oqaatigissavaralu Inatsisartutut sulineq saniatigullu suliffeqarneq artornarpallaarmata. Suliffiit taakku tamaasa immikkut pimoorussinnaassimanngilakka. Taamaammat maannakkut Inatsisartutut, taamaallaat sulivunga, Naaja Nathanielsen oqarpoq.

Naaja Nathanielsen aperaarput, ajoriffissaqartinneraa Inatsisartuni ilaasortat, inatsisartutut sulinermi saniatugut suliffeqartarnerat.

- Allat qanoq suliffeqarneri pillugit uanga oqaaseqarsinaanngilanga. Taamaallaat oqarsinnaavunga, Inatsisartutut sulineq ulapinnartuummat, ukioq kaajallallugu suliffiusoq. Taamaammat takorlooruminaatsippara Inatsisartut inatsisartuunermi saniatigut, ulloq naallugu allanik suliffeqartarneri, Naaja Nathanielsen oqarpoq.

- Eqqaamassavarput inatsisartuni qinigasanngortinnikuuvugut neriorsuuteqarluta allaannguutissanik suliaqarumalluta. Taamaattumik qinigaaffipput allanit sammisatsinninngarnit pingaarnerutittariaqarparput,

Malik Berthelsen Siumut sinnerlugu Inatsisartuni ilaasortaq taama oqarpoq.