Inatsisartut RG pillugu 503,75 millioni koruuninik qinnuteqarput

Inatsisartut Royal Greenlandimut katillugit 503,75 millioni koruuninik aningaasaliinissamik Aningaasaqarnermut ataatsimiititaliamut qinnuteqarnissamut inatsisartut ualisoq aalajangerput. Manna tikillugu naalakkersuisuusimasut qulaajaatitsineri kiisalu siunnersuusiortitsineri Naalakkersuisut siulittaasuata Kuupik Kleistip siunnersuuteqarnerminut tunngavigai, taamaattoq Illuatungiliuttut qinnuteqaammut taaseqataanngillat.
Allattoq Oline I. Olsen
juunip 19-at 2009 16:24

Inatsisartut matut matoqqasut tunuanni isummersorfigaat, Namminersornerullutik Oqartussat Royal Greenlandimik piginneqatigiissutaat 250 millioni koruuninik annertusineqarnissaat taakkualu saniatigut ingerlatsivimmut aningaasanik 253,75 millioni koruuninik atukissiisanerlutik. Inatsisartut aalajangernissaannut tunngavigisaat isertuunneqarput, inatsisartunilu amerlanerussuteqartut tamanna akueraat.

- Tassa Naalakkersuisut siunnersuutaat amerlanerussuteqartunit akuerineqarpoq, piginneqataassutigut qaffanneqassasut aamma piginneqatigiiffiup ingerlariaqqinnissaminut aningaasanik attartortinneqassasoq, Naalakkersuisut siulittaasuat Kuupik Kleist oqarpoq.

Taamatut aalajangerneq inuiaqatigiinnut pingaaruteqartoq, Kuupik Kleist oqarpoq.

-Imaanngittoq Royal Greenlandip ingerlariaqqinnissaanut, kisianni inuiaqatigiit aningaasarsiorneranut Royal Greenland qitiulluinnarmat, inuiaqatigiinnut pingaarutilerujussuuvoq, Kuupik Kleist oqarpoq. Allatullu aaqqissuusseqqinnissamut Naalakkersuisut iliuuseqassasut oqarluni.

Naalakkersuisunut illuatungiliuttut Siumut, piginneqatigiissutit qaffanneqarnissaanut isumaqataagaluarlutik, siunnersuummut tunngavigineqartut naammaginngilaat.

- Pappilissat isummersornissamut Naalakkersuisunit tunniunneqartut

tunngavigalugit isummersorpugut, ikkappallaarujussuarput. Taassuma saniatigut Royal Greenlandip nunarsuarmioqatigiit iluani aningaasarliornermut tulluarsaanera naammaginnginnatsigut. Aamma Aningaasanik atorniarsinnaanermik Namminersornerullutik oqartussat periarfissanik misissuisoqarsimanngilaq, Royal Greenlandimut atukkiunneqarsinnaasunik. Nunatta Karsia taama annertutigisumik artukkerneqarnissaa peqataaffigerusunngilarput, ullormiit ullormut, Siumut siulittaasua Aleqa Hammond oqarpoq.