Inatsisartut qulaatiinnarlugit naalakkersuisut iliuuseqarnerat uparuarpaat
Kalaallit Nunaanni partiit annersaata Inuit Ataqatigiit, Namminersorlutik Oqartussat Air Icelandilu immikkut ittumik timmisartuussinissamik isumaqatigiissuteqarsimanerat, assuaraa.
Naak IA Demokraatillu Naalakkersuisooqatigiikkaluarlutik, novembarimi aningaasaqarnermut Naalakkersuisup Demokraatineersup Palle Christiansenip Air Iceland Namminersorlutillu Oqartussat angallanneq pillugu isumaqatigiissuteqarfigisimavai. Tamanna Inuit Ataqatigiinniit namminersulivinnissamut ungasillisaataasutut nalilerneqarpoq. Inatsisartuni ilaasortaq IA-meersoq Aqqaluaq B. Egede ima oqarpoq.
- Naalakkersuinikkut anguniakkat ataatsimoorfigisavut tassaapput suliffeqarfiit nunatsinniittut nammineq napasunngortinneqarnissaat. Aqqutissat pilersissavagut, imminut napatinneq namminersulivinniarnerlu anguniarlugu. Namminersulivinnissaq ungasillisarneqassaaq, nunatta avataaninngaaniit sulisussat isumaginnittussallu ingerlatinneqalissappata. Taamaammat nunatta avataanut timmisartunik assartuisarnissamut isumaqatigiissut torrallataanngitsutut Inuit Ataqatigiinninngaaniit isumaqarpugut, Aqqaluaq B. Egede oqarpoq.
Inatsisartut Aningaasaqarnermut ataatsimiititaliaani ilaasortap,
Per Berthelsenip, Air Icelandip Namminersorlutillu Oqartussat isumaqatigiissimanerat naalakkersuisunit saqqummiunneqarsimannginnerarpaa.
-Ajuusaarutigivara naalakkersuisut taama matoqqatigisumik sulinerat. Aningaasaqarnermut ataatsimiititaliami tusagaqarnikuunngilagut, partiit tunuliaqutaasut aamma paasivakka annertunerusumik tusaqarsimanngitsulluunniit. Tamanna uggornarpoq, naalakkersuisooqatigiit taakkua ammasumik suleriaasissamik oqalunnerat tassani sakkortuumik-aasiit unioqqutinneqarmat, Per Berthelsen oqarpoq.
