Inatsisartut immikkut ittumik ataatsimiisinneqarneranni ullumi; naalakkersuisut siulittaasuata qinersinissamik kissaataa akuersissutigineqarpoq. Inatsisartunut novembarip 22-anni qinersinissaq novembarip 15-iannut aamma siuartinneqarpoq. Kattusseqatigiit Demokraatillu siuartitsinermut akuersinngillat. Kattusseqatigiit siulittaasuata Anthon Frederiksen-ip akuerseqataannginnini ima tunngavilerpaa:
-Ulloq ataasiinnaq periarfissaralutigu ilisimatinneqariasaarpugut novembarip 15-iannut siuartinneqarnissaa siunnersuutigineqartoq.
Anthon Frederiksen isumaqarpoq Aningaasanut Inatsisaangallartussap tunngavilersuutigineqarnera pissusissamisuunngitsoq. Innuttaasut qinersisoqarnissaanik piumasaqareersut aatsaat taama kingusitsigisumik qinersisoqarnissaanik nalunaartoqarnera tunngavilersuutigineqarsinnaanngitsoq.
Qinersinissap siuartinneqarneranut Demokraatit aamma akerliusut siulittaasuat Per Berthelsen ima oqarpoq:
- Nunatta aqunneqarneranut ilisarnaataalersoq aqunneqarnikkut aalajaalluinnartumik sangujoraarnersuaq isummanillu attassiinnarsinnaannginnersuaq naggataarutigiumanagu, taamaalillutalu avataanit illaruaatigineqarnerput unitsikkumallugu tatiginartumilli oqariartuummik attassilluta 22-anni qinersinissaq attatiinnarumagaluarparput, kisianni ikinnerussuteqarpugut. Qinersinissarli tikilluaqqugatsigu akuerseqataaginnarluta.
Naalakkerasuisooqataasut Inuit Ataqatigiit qinersinissap siuartinneqarnissaanut siunniusseqataasimasut siulittaasuat Josef Motzfeldt ima oqarpoq:
- Sapinngisamik inatsisartunut qinersereernerup kingorna piffissaq atorluarniapallarujussuartariaqarpoq, inuiaqatigiit pisariaqanngitsumik unikaallasimaartinnerat sivikinnerpaamiitinniartariaqarmat.
- Oqartoqarsinnaagunaraluarpoq sapaatip akunnera suunngitsoq, kisianni naalakersuisunngortitsiniarnermi tamatumalu kingorna inatsisartunik nutaanik ataatsimiigiaqqusinermi taavalu inatsisartut 2006-imi Aningaasanut Inatsissaq eqqarsaatigalugu sulinissaannut sapaatip akunnera pingaaruteqartorujussuuvoq.
Tamanna pillugu Inuit Ataqatigiit siuartitsinissamik naalakkersuisuni suleqataasimasut Josef Motzfeldt erseqqissaavoq.
Naalakkersuisut siulittaasuata Hans Enoksen-ip qinersinissamik siuartitsineq ima nassuiaateqartippaa:
-Innersuussuteqartussaatitaavunga naalakkersuisooqatikkalu aalajangiiniarnermi peqataasussaapput. Taava isumasioqatigeeriarluta aalajangerparput sapaatip akunneranik siuartitsisoqassasoq. EU-mut isumaqatigiinniarpugut inuiaqatigiinnilu suliassat pingaaruteqartut arlallit sivikinnerpaamik uninngatinnissaat siunnerfiuvoq.
Hans Enoksen aamma oqarpoq partiit qinersisoqarnissaanik piumasaqareersut piffissap siuaallatsinneqarnissaanik ajorinnilersut.
- Kisianni tassa Aningaasanut Inatsisissap naammassineqapallanissaa tunngaviuvoq.
Qinersinissamik siuartitsineq Atassummit isumaqatigineqarpoq, Finn Karlsen Atassutip siulittaasua oqarpoq, siuartitsisoqarneratigut sulineq taamaalilluni piaartumik aallartissinnaanngortoq.