Inatsisartut pujortartarneq oqaluuseraat
Kikkulluunniit ornissinnaasaanni inini pujortaqqusinngilluinnarnerup 2009-mi januaarip aallaqqaataanit atuutilernissaanik Juliane Henningsenip IA-meersup siunnersuutaa aamma kikkulluunniit ornissinnaasaanni immikkut pujortartarfeqalernissaannik Doris Jakobsenip Siumumeersup siunnersuutaa Inatsisartuni siullermeerneqarlutik ullumi oqaluuserineqarput.
Siunnersuutillu taakku marluk partiinit tamanit Inatsisartut Peqqissutsimut Ataatsimiititaliaanni oqaluusereqqitassanngortinneqartussatut ingerlateqqinneqarput.
Nuummi neriniartarfiit nammineq piumassutsimik immikkut pujortartarfinnik pilersitseriaraluarnikuupput – iluatsinngitsumilli, Peqqissutsimut Naalakkersuisup Arkalo Abelsenip oqaatigaa, neriniartarfinni kikkunnilluunniit orninneqarsinnaasuni nerisassanik sassaallerfiusartuni pujortarfigeqqusaanngitsunik pilersitsinissaq Naalakkersuisut soqutigigaat aamma oqaatigalugu.
Pujortaqqusinnginnerup unioqqutinneqarnerani pineqatiisarneq ajornakusoorsinnaasoq Naalakkersuisup aamma oqaatigaa.
Imerniartarfinni nerisassanik sassaallerfiunngitsuni pujortartarneq Demokraatit ajoriffissaqartinngilaat, akerlianilli Atassutikkut ima oqarput:
- Tamanit orniguffiusartuni pujortartoqannginnissaa aallaqqaammut ippigineqassaaq, ilami ornittakkani pujortartoqassasoq ileqqussaannartut isigilersimagatsigu, qularutiginnginngilluinnarparpullu ornittakkani tamani pujortartoqartannginneranik ileqqoq sungiunneqarumaartoq, Atassut sinnerlugu Kristian Jeremiassen oqarpoq.