Inatsisartut piffissaq eqqorlugu naammassissapput

Inatsisartut upernaaq manna ataatsimiinnerat piffissaq eqqorlugu naammassisussanngorpoq, tassalu ullumikkut naggataamik ataatsimiipput.

Piffissamik eqquiniarneq pissutaalluni apeqquteqaatit marluk ukiamut ataatsimiinnissamut apeqquteqaateqartut noqqaassuteqarnerisigut kinguartinneqarput. Apeqquteqaateqartut tassaapput, Anthon Frederiksen, Kattusseqatigiit Partiiat aamma Ruth Heilmann, Siumut. IA-meersup Ane Hansenip apeqquteqaanni aamma kinguartippaa, pisuussutit uummassusillit nakkutigineqarnerannut naleqqussaanissamut tunngasoq silaannaap allanngoriartornerata malitsigisaanik.

Doris Jakobsenip Siumumeersup siunnersuummi taasissutigineqaqqinnissaa kissaatigimmagu, tassa pisortaqarfinni tamani matut minnerpaamik kalaallisut allagartalersorneqassasut. Siusinnerusukkut tunuartinneqarsimavoq, naalakkersuisulli kukkullutik taasisimammata saqqummiuteqqinneqarpoq. Naalakkersuisut siulittaasuat, Hans Enoksen, nammineerluni oqaluttarfimmut qaqeriarluni oqarpoq kukkussuteqarsimalluni, angertussaagaluarluni naaggaarsimagami. Taamaaliornerali iluaqutaangaanngilaq, allagartalersuinissamummi aqqanillit akerliupput qulit taamaaliorusukkaluartut.

Demokraatit Palle Christiansenertaata Doris Jakobsen tuppallersarpaa, inatsisartut allagartalersuinissanik ilitsersuutinik piffissaajarneqassanngitsut.

Oqarluni:

- Allagartalersuinissat Namminersornerullutik Oqartussat pisortaannut oqaatigiinnarumaarpat !