Inatsisartut oqaluuserisassaat oqimaakuluttut sisamaapput

Inatsisartut ullumi ataatsimiilerunik oqaluuserisassat assigiinngitsut sisamat oqaluuserissavaat.

Lotto-mik eqquiniaanermi akitsuutit aammalu pinnguaatit aningaasanoorutit akitsuutaasa qaffanneqarnissaat Demokraatineersup Lene Knüppelip siullermeerutaasumik siunnersuutigissavaa. Qaffaatit 2,5 mio. koruuninik nunatta karsianut qaffariarpata, taakku aningaasanoorutinik nappaateqartut katsorsarneqarnissaannut atorneqarnissaat siunnersuummi eqqarsaatigineqarpoq.

Taamatuttaaq Atassutikkunniit siunnersuutigineqassaaq aningaasanoornermik pinngitsuuisinnaajunnaarsimasunut katsorsaanermut aningaasat 2,5 mio. koruunit immikkoortinneqarnissaat.

Oqaluuserineqartussat pingajuat demokraatiniit aamma siunnersuutigineqarpoq tassalu; Meeqqat angerlarsimaffiup avataani inissinneqartartut amerlassusaasa kisitsisinngorlugit takussutissaqalernissaannik siunnersuut.

Sisamaattullu oqaluuserineqassaaq nunatsinni kommunit suleqatigalugit angajoqqaanngortussat tamarmik 2009-mi januaarip aallaqqaataa aallarnerfigalugu pikkorissarnissamik neqeroorfigineqartalernissaat, siunnersuullu taanna demokraatineersup Jens B. Frederiksenip siunnersuutigissavaa.