Inatsisartut oqallinneranni siullermi suut tamarmik oqallisigineqarput
Naalakkersuisut siulittaasuata ammaalluni oqalugiutaa, Siumup siulliulluni oqaaseqarfigaa. Oqaaseqartup, Per Bethelsenip naliliinermini oqaatigaa, nuannaarutigalugu Aleqa Hammondip oqalugiarnermini, inuttut qanilaarneq inuuniarnikkullu ajornartorsiutit oqalugiutaata annersaani ersersinniarneqarmata.
Per Bethelsenillumi oqalugiarnermini Nunatsinni suliffissaaleqqinerujussuup annertusiartuinnarnera sammerpiarnagu, politikkikkut anguniagassat aningaasartaqarpianngitsut sammineruai.
Apeqqarissaartunulli Per Berthelsenip akissutaanni erserpoq, pilersitassat assigiinngitsorpassuit, Siumup naalakkersuisooqataasalu anguniagassaat pingaaruteqarluartut amerlagaatsiartuusut, kisiannili aningaasat suminngaanniit aaneqassanersut akissutaani erseratik.
Aalisarnermut tunngasut sammineqarneranni Per Bethelsenip oqaatigaattaaq, pisasseeqqittarneq nungusaataasussatut isigineqartariaqanngitsoq, tassami Nunatsinni inuuttaasut taama ikitsigigatta tamanna ulorianartorsiortitsisinnaanngitsoq.
Illutungiliuttut partii, Inuit Ataqatigiit ammaanermi oqalugiaammut oqaaseqarnerminni, Kuupik V. Kleistip naqissuserpaa, uranimut apeqqummut, Narsarmiut kisimik pineqartillugit, inuiaqatigiit tamarmik taasitinneqassappata, tamanna Inuit Ataqatigiit taaseqataaffigissanngimmassuk. Kuupik V. Kleistip Naalakkersuisunngortut qanga pissutsinut utersaarneri uggoralugu oqaatigaa, oqarluni taakku matoqqasuusut, aaqqiiniapallattarnernut aamma atorfinitsitsisarnernut eqqumiitsunut utersaarsimasut oqaatigalugu.
Atassutip oqaaseqartartuata, Sivert K. Heilmannip oqaaseqarnermini atorfinitsitsisarnerit aamma oqaaseqarfigai, oqarluni taakku nalaatsornerinnakkut kukkusumik atorfinitsinneqartarsimagunartut. Taama oqaaseqarnermi saniatigut, Sivert K. Hielmannip naqissuserpaa, Naalakkersuisooqatigiit suleqatiginerisa saniatigut illuatungiliuttut ataqillugit Atassutip suleqatiginiarumaarai.
Naalakkersuisooqatigiit pilersinniarneqarnerata nalaani isumaqatigiinniarnermi, Partii Inuit politikkikkut anguniagaasa ilarpassuit allanngortinneqartariaqarsimasut, Randi Brobergip nassuerutigaa, oqaatigalugulu tamatumunnga nammineq inuttut isumaqataasimanngikkaluarami, taamaattorli Naalakkersuisooqatigiit pitsaasumik suleqatigissallugit neriorsuilluni.
Partii Inuit ilanngullugu oqaaseqarfigaat, Nunatsinni imminut toquttarneq, Nunasiaataasimanitta kinguneranik ilaatigut tamanna pissuteqarmat. Tamatumunnga Demokraatit isumaqataanatik oqaatigaat, allat pisuutinnagit immitsinnut qiviaqaartariaqartugut namminerlu ajornartorsiutinik aaqqiiniartariaqartugut oqaatigalugu.
Jens B. Frederiksenip taama oqarnermi saniatigut Naalakkersuisooqatigiit pissaanermik tigusinermi kingorna aallartinnerliorsimasutut oqaatigai.
