Inatsisartut nutaat ataatsimeerngaalerput

Inatsisartunut ukiarmi qinersinerup kingorna Inatsisartunngortut 31-iusut ukiuunerani ataatsimiinnertik, aqaguagu pingasunngorpat februaarip 15-ianni aallartissavaat. Ataatsimiinneq ulluni 17-ini sivisussuseqassaaq. Ataatsimiinnermi oqaluuserisassani pingaarnerpaagunarpoq Naalakkersuisut ukioq mannamut Aningaasanut Inatsisissatut siunnersuutaata akuersissutigineqarnissaa.

Inatsisartut ukiuunerani ataatsimiinnerat aallarnerlugu Aningaasanut Inatsisissaq ukioq mannamoortoq 5,5 milliarder koruunit nalinginut sinaakkuserneqartoq, qinersisimanerlu pissutigalugu kingusinaartariaqartoq oqaluuserineqassaaq. Aningaasanut Inatsisissaq amigartooruteqarnermik inerneqartussatut missingersugaavoq.

Tamatuma saniatigut Inatsisartuni ilaasortanit Naalakkersuisunillu siunnersuutigineqartut apeqquteqaatigineqartullu katillugit 83-it ullut 17-it ingerlaneranni oqalusserineqassapput.

Inatsisartunut novembarimi qinersineqarmat Siumut Atassut Inuit Ataqatigiillu Namminersornerullutik Oqartussaqarnerup oqaluttuarisaanerani siullermeerlutik naalakkersuisooqatigiilerput, tamannalu ataatsimiinnissami matumani immikkut aamma maluginiagassaassaaq, ingammik illuatungiliuttut ukiunut siuliinut naleqqiullutik ikinnerulermata. Demokraatit kattusseqatigiillu Partiiat kingumut illuatungiliuttunngortut suliaminnik ingerlatsinissaat pissanganarpoq, qinersinerummi kingorna illuatungiliuttut aappaasa Demokraatit siulittaasuat Per Berthelsen neriorsuivoq Demokraatit sinnerlugit Inatsisartuni ilaasortat arfineq-marluusut naalakkersuisunngortunut sinnattupiluttut misinnarumaartut.

Inatsiartut ataatsimiinnissannut partiit inatsisartuniititaqartut tamarmik siunnersuuteqarput, Demokraatit Inuit Ataqatigiillu tamarmik immikkut amerlanerpaanik tassa 17-inik siunnersuuteqarput. Kattusseqatigiit partiaat 15-inik, Siumut aqqanilinnik kiisalu Atassut tallimanik oqaluuserisassatut siunnersuuteqarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat