Inatsisartut nittartakkatigut malinnaavigikkit
Nuummi Inatsisartut ataatsimiittarfiata silataani erfalasut ullumi amuneqassapput Inatsisartunilu ilaasortat 2007-imi upernaakkut ataatsimiinnerup ullumikkut nalunaaqutaq ataatsinut ammarneqarnissaanut piariissallutik. Upernaakkut ataatsimiinneq KNR-ip nittartagaatigut nutaamik malinnaaffigineqarsinnaalissaaq. www.knr.gl atorlugu inatsisartunit nutaarsiassanik ataavartumik malinnaasoqarsinnaalissaaq. Upernaakkulli ataatsimiinneq nittartakkami allatut aamma sammineqassaaq.
Tassa politikerit assigiinngitsut KNR-ip nittartagaanut ullorsiutinik allagaqartassammata. Aamma naalakkersuinermut tunngasunik apeqquteqartarfeqassaaq, tassa kikkulluunniit knr.gl atorlugu Inatsisartunut ilaasortanut apeqquteqarsinnaassapput apeqqutillu nittartakkakkut akineqartassallutik.
- Nittartakkami nutaamik suliniutivut ataatsimiinnermik radiukkut tv-kkullu sammisaqartarnitsinnut tapertaassapput. Apeqquteqartarfimmik pilersitsinitsigut innuttaasut naalakkersuinikkut oqalliseqataanissaat periarfissinniarpagut aamma ullorsiuteqartitsinitsigut innuttaasut politikerit suliaat ulluinnarnilu inuunerat paasisaqarfigisinnaassavaat. Innuttaasunik kiffartuussinermik pisussaaffeqartutut siamasissumik samminnittarnissarput inuiaqatigiinnilu innuttaasut pimoorussillutik suliniuteqarnissaannut tinnersaasuunissarput pingaaruteqarpoq, KNR-ip nutaarsiassaqartitsiviani pisortaq Pia Christensen oqarpoq.
Apeqquteqartarfiup ullorsiutillu saniatigut nutaamik knr.gl-imi isummersortarfeqassaaq aamma assigiinngitsunik taasisitsisoqartassalluni. Maanna taasisitsineq siulleq kommunit kattussuunneqarnissaannut tunngasoq peqataaffigisinnaavat, taannami ullumikkut Inatsisartuni oqaluuserineqartussaavoq.
