Inatsisartut naggataariartuaarput
Inatsisartut ukiaanerani ataatsimiinnerat ullumimit pingasunngorneq ilanngullugu naggataarneqassaaq oqaluuserisassat katillutik 33-t naammassiniarneqassalutik, ilaat ima ilungersunartigisut minnerpaamik naalakkersuisoq ataaseq navianartorsiorsinnaalluni tatiginninnginnermillu suaarutiginniffigineqarsinnaalluni.
Oktoberip naajartornerani inatsisartut ataatsimiinnerat naalakkersuisunut ataasiakkaanut tatiginninnginnermik nipilimmik imaqartuarpoq, pingaartumik Inatsisartut kukkunersiuinermut ataatsimiititaliaata aalisarnermut naalakkersuisoq Simon Olsen inuussutissarsiutinut tapiisarfiup ESU-p aningaasaataanik aqutsinerliorsimasutut isummerfigaat pingaartumillu illuatungiliuttut Sermitsiakkut kingullikkut Simon Olsen siunnersorpaat novembarip qulingiluaanni kukkunersiuinermut ataatsimiititaliap nalunaarutaa oqaluuserineqalertinnagu tunuaannaruni ajunnginnerusoq. Simon Olsen ilaatigut oqaatigineqarpoq tapiissutitigut kammalaatini salliutittarsimagai. Marlunngorpat ilaatigut ESU-p oqaluuserineqarnera naalakkersuisup ataannarnissaanut aalajangiisorujussuussasoq pasitsaannarpoq.
Ualeru oqaluuserisassat katillutik 19-iupput amerlanersaat pingajussaaneerinerit tupap akiorniarneqarnissaanit, meeqqanik inuusuttunillu ikiorsiisarnermit, KNI pillugu peqqussutip allanngortinnissaanit aningaasarsiornermik ingerlatsiviit pillugit inatsiseqalernissaq ilaallutik. Marlunngorpat oqaluuserisassat siullersaraat landskarsip naatsorsuutaasa akuersissutigineqarnissaat, tassanilu tassa ilaatigut kukkunersiuisut nalunaarusiaat aalisarnermut naalakkersuisup, Simon Olsenip akissuteqarfigissavaa.
Pingasunngorpat utoqqalinersiaqarnermut tunngasut oqaluuserisassat sisamaapput aamma oqaluuserisassanut ilaalluni radiokkut TV-kkullu aallakaatitsisarneq pillugu peqqussutissanut siunnersuutip pingajussaaneerneqarnissaa.
