Inatsisartut naalakkersuisooqatigiit nutaat akueraat
Naalakkersuisut siulittaasuata, Kim Kielsenip Naalakkersuisunik nutaanik inissiiniarnera Inatsisartunit akuerineqarpoq.
Inatsisartuni ilaasortat 13-it akuersipput, 11-t taaseqataanngillat akerliusoqaranilu.
Naalakkersuisut siulittaasuata, Kim Kielsenip ilaasortat uku Naalakkersuisunut innersuuppai
1. Vittus Qujaukitsoq, Nunatta Qitornai.
2. Jess Svane, Siumut.
3. Karl Frederik Danielsen, Siumut.
4. Steen Lynge, Demokraatit.
5. Jens Frederik Nielsen, Demokraatit.
6. Anna Wangenheim, Demokraatit.
7. Jens Immanuelsen, Siumut.
8. Ane Lone Bagger, Siumut.
9. Martha Abelsen, Siumut
Demokraatinit ilaasortat nutaat pingasut taamaalillutik naalakkersuisutut pisortatigoortumik imminnut taasinnaanngorput.
Steen Lynge nunanut allanut tunngasunut nukissiuuteqarnermullu naalakkersuisunngorpoq.
Anna Wangenheim peqqissutsimut naalakkersuisunngorpoq.
Jens Frederik Nielsenilu inuussutissaqarnermut aatsitassanullu naalakkersuisunngorpoq.
Partiit illuatungiliuttut: Taarseraannerit amerlavallaarput
Akuersineq illuatungiliuttut partiiannit isornartorsiorneqanngitsuunngilaq.
- Naalakkersuisooqatigiit 2018-imiilli sisamassaa nutaanngorput, Inuit Ataqatigiit siulittaasuat, Muté B. Egede ilaatigut oqarpoq.
Kim Kielsenilli naalakkersuisooqatigiini nutaat illersorpai:
- Nunatta Qitornaasa Demokraatillu pingaarutilinnik aalajangiisoqartussanngoraangat matut matorlunneq ajorpaat. Naalakkersuisunilu ilaasortat nutaat oqarfigerusuppakka: Partiit illuatungiliuttuugaluarpataluunniit suleqatigissagisi naatsorsuutigilluinnarpara, Kim Kielsen oqarpoq.
Demokraatit siulittaasorigallagaat, Nivi Olsen, naalakkersuisunngornissaminik kissaateqanngilaq. Taamaammat parteeqatini sulilluarnissaanik kissaateqarfigai:
- Naalakkersuisut amerlanerussuteqaqqinnerulersinnaanerat innuttaasunut toqqissisimanarnerussaaq, pingaartumik piffissami matumani. Inatsisartuni oqallittarneq piffissami kingullermi sakkortuvoq. Inuinnaavugut, ukulu akisussaaffimmik annertuumik tigusillutik naalakkersuisunngortut taakku pingasut tatigilluinnarpakka, Nivi Olsen oqarpoq.
