Inatsisartut marsip aallaqqaataani ataatsimiilissapput
Inatsisartut Siulittaasuata Josef Motzfeldip ippassaani tassa pingasunngormat upernaammut inatsisartut ataatsimiinnissaannut oqaluuserisassat ullullu ataatsimiiffissat akuerai.
Inatsisartut upernaakkut ataatsimiinissaat pilersaarutit malillugit marsip aallaqqaataani aallartissaaq apriilip 13-iani naammassereernissaa natsorsuutigineqarluni.
Ullut ataatsimiiffiusussat katillugit 18-iussapput, oqaluuserisassallu 49-t oqaluuserineqassallutik.
Oqaluuserisassat 49-t saniatigut Nunat Avannarliit Killiit Siunnersuisoqatigiiffiata kaammattuuteqarneratigut oqaluuserisassat nunat avannarliit suleqatigiinnerannut tunngasunik tallimanik aamma ilaneqarnissaat akuerineqarpoq.
Inatsisartut ukiaanerami ataatsimiittarnerattuut upernaakkut ataatsimiinneq ingerlanneqassaaq, tamatumuunali sapaatip-akunnerini sisamani siullerni marlunngorneq, pingasungnorneq sisamanngornerlu ataatsimiiffiusassallutik, sapaatip-akunneri kingulliit marlunngornikkut pingasunngornikkullu ataatsimiittoqartassalluni. Aamma sapaatip akunnikkaartumik pingasunngornerit tamaasa nalunaaqqutaq aqqanerniit ullo'qeqqata tungaanut apeqquteqartoqarsinnaasassaaq.
Inatsisartut ataatsimiinissaat pillugu annertunerusumik paasisaqarusukkuit www.inatsisartut.gl-imut iserlutit suut ataatsimiissutigineqassanersut qimerluualaarsinnaavat.