Inatsisartut marlunngornermi immikkut ittumik ataatsimiissasut
Inatsisartunut qinersinissap ullulerneqarnissaa oqaluuserisassatuaavoq.
Naalakkersuisummi siulittaasuata Kim Kielsenip, Inatsisartunut qinersisoqarnissaa, ataasinngornermi marsip ulluisa tallimaanni nalunaarutigaa.
Apriilip ulluisa 17-ianni 24-anniluunniit qinersisoqarnissaa taamanikkut nalunaarutigaa, Inatsisartunullu tamanna aalajangigassanngortillugu.
AAMMA ATUARUK Aprilip 24-anni qinersinissarput Kim Kielsenip siunnersuutigaa
Inatsisissatut siunnersuummut nassuiaatini ima ilaatigut allassimavoq:
"Naalakkersuisut Siulittaasuata Inatsisartunut immikkut ittumik qinersinissaq nalunaarutigineqassasoq, maannakkut politikkikkut inissisimaneq tunngavigalugu Inatsisartut qinnuiginiarlugit aalajangerpoq. Siunnersuutip atuunnerani Inatsisartunut ulloq 24.april 2018 Inatsisartunut immikkut ittumik qinersineq ingerlanneqassaaq."
Inatsissatut siunnersuut ullormi ataatsimiiffiusumi siullermeerneqarlunilu, aappassaaneerneqarlunilu pingajussaaneerneqassaaq.
Taamaalereerpat aatsaat paasissavarput Inatsisartunut apriilip ulluisa 24-anni qinersisoqassanersoq.