Inatsisartut kissaateqaqaat
Naalakkersuisut siulittaasuata Kim Kielsenip Inatsisartut ataatsimiinnerisa ammarnersiorneqarnerani oqalugiaataa Inatsisartunit ullumi oqallisigineqarpoq. Partiilli oqaaseqarnissaminnut piffissartik atorluarlugu namminneq kissaatitik saqqummiuppaat.
Aaqqissuusseqqinnissanut Ataatsimiititaliaagallartumik, partiinit tamanit peqataaffigineqartumik, pilersitsinissaq Inuit Ataqatigiit kissaatigaat, taassuma suliassarissallugu aaqqissuusseqqinnissanut ilisimasatigut tunngavissat katersornissaat, taamaalioreerunillu akileraartarnikkut, ineqarnikkut isumaginninnikkullu iluarsaaqqinnissat qanoq aaqqissuunneqassanersut oqallisigissallugit.
IA-ip taamatut siunnersuuteqarneranut tunngaviuvoq, partii isumaqarmat, utoqqalernersiutit aamma siusinaartumik pensionit pillugit qanittukkut iluarsaaqqinnerit eqqarsaatigilluagaanngitsuusut.
Sikuki Nuuk Harbour RAL-imut nuunneqarnissaanik kissaat
Partii Naleraq kissaateqarnissamut aamma tunuarsimaanngilaq. Partiip siulittaasua Hans Enoksen ilaatigut oqarpoq, Nuummi umiarsualiviorneq naammassippat Sikuki Nuuk Harbour atorunnaarsinneqarluni suliai Royal Arctic Linep nuunneqassasut, tamaalilluni aningaasanik sipaarfiussammat.
Ingerlatsivinnimmi amerlavallaanik assigiianik sulialinnik pilersitsiortoqartoq, Partii Naleraq isumaqarpoq.
Nunatsinni atorfiit nunaqavissunik inuttalersorneqarnissaat taassuma aamma kissaatigaa.
Illorsualiornissamut naaggaartut
Demokraatit oqaaseqaatiminni Inatsisartut nutaamik aatsimiittarfittaarnissaminnut pilersaarutaannut naaggaarput. Aningaasat illorsuassamut atornagit, ilaqutariit ineqarnissaannut atorneqartariaqartut, Demokraatit oqaaseqartuat Justus Hansen oqarpoq.
Taamatullu aningaasat taakku sinerissami ineqarnermi aserfallatsaaliuinermut paaqqinnittarfinnullu, oqoqalersimasunut, atorneqarsinnaasut Partii Naleqqap Demokraatinut isumaqataalluni aamma tikkuarpaa.
