Kielsen: Inatsisartut kiffartuussinissamik isumaqatigiissutit sinaakkusernikuuaat

Naalakkersuisut siulittaasuata Kim Kielsenip marlunngornermi ullaap tungaa tusagassiortunik katersortitsinermini sulianut Naalakkersuisooqatigiinnissamut isumaqatigiissutaasunut killiffiit oqaluuserai.
Kujataani Qeqertarsuullu tunuani angallassinissamut kiffartuussinissamik isumaqatigiissutit innuttaasunit isornartorsiorneqaqisut Kim Kielsenip saqqummiinermini oqaaseqarfiginngilai.
KNR-ili suliaq pillugu apeqquteqarmat Kim Kielsen nassuiaavoq, Inatsisartut Aningaasaqarnermut Akileraartarnermullu Ataatsimiitsitaliaata aningaasanut sinaakkusiussaat aallaavigalugu Naalakkersuisut kiffartuussinissamik isumaqatigiissusiorsimasut.
Naalakkersuisullu kujataani Qeqertarsuullu tunuani angallannermi atugassarititaasut ajorseriannginnissaat sulissutiginiarsarigaat, Kim Kielsenip oqaatigaa.
- Kujataaniinnaanngitsoq aamma avannaani Qeqertarsuup tunuani kiffartuussinissamik isumaqatigiissut eqqarsaatigalugu aamma ajornartorsiuteqarpugut, Kim Kielsen KNR-imut oqarpoq, oqaatigalugulu Naalakkersuisut Inatsisartullu eqqartueqatigiinnissaat tulluartutut isigalugu.
Taamaasilluni Naalakkersuisut Siulittaasuata Inatsisartut aningaasaleeqqissinnaanerat ammaffigalugu takutippaa.
Naalakksersuisooqatigiinneq nalilersuiffigineqassasoq
Kim Kielsenip kiffartuussinissamik isumaqatigiissutit, Knud Kristiansenimit susassaqarfigineqartut, Siumumi siulittaasutut saqqummerluni sapaatip akunnerata siuliani akerlilersorpai, isumaqatigiissutit ajorseriarnissaat Siumup kissaatiginngikkaa erseqqissaassutigalugu.
Aamma nuna tamakkerlugu pilersaarusiap, Randi Vestergaard Evaldsenip Demokraatineersup suliaa, Inatsisartuni oqallisigineqannginnerani Kim Kielsenip tunuartippaa.
Pisut taakku eqqarsaatigalugit Naalakkersuisooqatigiit suleqatigiinnerat qanoq innersoq aperineqarami akivoq
Naalakkersuisooqatigiit suliniutaanni iluatsittut iluatsinngitsuninngaanniit isigineqartariaqartut.
Naalakkersuisooqatigiilli suleqatigiinnerata iluani nalilersuisoqartariaqartoq Naalakkersuisut Siulittaasuata nassuerutigaa.
Tamannalu qinigaaffiup matuma qiteqqunnerani pissasoq isumaqatigiissutaasimavoq.
Naalakkersuisut Siulittaasuata tusagassiortunik katersortitsinera allaaserisat ataani takuuk.