Inatsimmik allannguineq nutaaq ilinniartut meerartaarnermi kingorna ilinniartut ineqarfianniiginnarnissaannut periarfissiissaaq. Toqqorsivimmit assi.

Inatsisartut isumaqatigiittut: Ilinniartut meerartaarnermi kingornatigut ilinniartut ineqarfianniiginnarsinnaassapput

Ilinniartut ineqarfiinut inatsit allanngortinneqassaaq, taamaalillutik angajoqqaanngortut inigisaminnik annaasaqartassanngillat. Inatsisartunit partiit tamanna isumaqatigiissutigaat.

Ilinniartuuguit naartulerlutillu ineqarunnaaratarsinnaavutit.

Inatsimmi malillugu meerartaaruit ilinniakkat unitsissavat, taamaalillutillu ilinniartut ineqarfianniiginnarnissamut pisinnaatitaaffeqarunnaassallutit.

Inatsiartunili isumaqatigiittut tamanna allannguiffiginialerpaat.

- Naalakkersuisut ilinniarnerup nalaani toqqissimasunik ilinniagaqartut atugassaqartitaasarnissaat qularnaarneqassasoq kissaatigaat. Tamatumunngalu ilaavoq ilinniagaqartup ineqarfeqarnermini atugai, Peter Olsen (IA) upernaakkut ataatsimiinnermi sisamanngornermi oqaaseqartarfimmit oqarpoq.

Taassuma inatsimmik allannguinissamut siunnersuut, ilinniartut ilaqutartaaraluartulluunniit ilinniaannarsinnaalernissaannut periarfissiisoq saqqummiuppaa.

Meerartaarneq inuup pisinnaatitaaffigigaa

Siunnersuut Ilisimatusarfimmi ilinniartut siunnersuisoqatigiiffiannit Pitamit kissaateqarnermit tunngaveqarpoq.

Tamannalu partiinit tamarmit taperserneqarpoq.

- Ilinniarnerup nalaani meerartaartunut atugassarititaasut allanut naleqqiullugit ajornerunerat pissusissamisuunngilaq. Ilinniartuuneq apeqqutaatinnagu meerartaarneq inuup pisinnaatitaaffigaa, Inuit Ataqatigiinnit, Mariia Simonsen sisamanngornermi ataatsimiinnermi oqarpoq.

AAMMA ATUARUK Peter Olsenip ilinniartut isumaqatigai: Ineqaannarsinnaasariaqarput

- Siumumi isumaqarpugut ilinniartut erninerminnut atatillugu, ilinnianngiffeqarallarnermi kollegianit anisariaqalertarnerat pitsaasuunngitsoq, Siumumit Doris Jakobsen oqarpoq, taassumalu ilinniartut ineqarfiinik amerlanerusunik pisariaqariaqartitsisoqarnera ilanngullugu erseqqissaatigaa.

- Nalunngilluinnarparput kollegiassaaleqisoqarmat taamaattumillu nutaanik ilinniartut ineqarfiinik sanaartortuarnissaq pisariaqarpoq, taanna oqarpoq.

Demokraatinit Nivi Olsenip saqqummiinerminni ilinniartut angajoqqaanngorlaat illoqarfimmit ilinniarfigisaminniit nuuttariaqarnerat inuiaqatigiinnut kingunerluuteqarsinnaanera oqaatigaa.

- Ajornerpaamik kinguneqassaaq tamanna ilinniakkamik ingerlatitseqqinnginnissamik aalajangiisooqataasassappat. Tamanna innummut pineqartumut inuiaqatigiinnullu ajuusaarnartuussooq, Nivi Olsen oqarpoq.

Aasamit atuutilersinnaasoq

Ajornartorsiut Ilisimatusarfimmi ilinniartut siunnersuisoqatigiiffiannit Pitamit aasaq oqallisigineqalerpoq.

Siunnersuisoqatigiinnut akuusup, qinikkat ilinniartut unammigassaannut oqilisaarusunnerat nuannarutigaa.

- Partiit amerlanerussuteqartut inatsisip taassuma allanngornissaa isumaqatigiissutigimmassuk pitsaasutut isigaarput. Qiviaraannimi ilinniartutut meerartaarnerup nalaani, ilinnianngiffeqarnissap nalaani najukkamit aninissaq akueriuminaatsutut isigigatsigu. Angajoqqaanngorlaajulluni aqqusinermut anisitaaginnarnissaq tupinnarpallaaqigami, Soriina Davidsen oqarpoq.

Siunnersuut Kultureqarnermut, Ilinniartitaanermut, Ilisimatusarnermut Ilageeqarnermullu ataatsimiititaliamut manna suliarineqartussanngortinneqarpoq, taannalu Inatsisartut pilersaarut malillugu apriilip ulluisa 21-anni aappassaaniissavaat.

Siunnersuutip pingajussaaneerneqarnissaa apriilip ulluisa 28-annut pilersaarutaavoq, siunnersuullu akuerineqassaguni juulip ulluisa aallaqqaataanit atuutilissaaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl