Inatsisartut Ataatsimiititaliarigallagaat Islandimut angalaqqammerpoq
-Ataatsimiititaliap sulinermini atorluarsinnaasaanik paasissutissanik amerlasuunik soqutiginaatilinnik pissarsivugut. Soorluttaaq Kalaallit Nunaanni aluminiuliorfittut sanaassap angissusissaa, minnerunngitsumillu erngup nukinganik innaallagissiorfiliassap angissusissaa takorlooruminarsisut, ataatsimiititaliami siulittaasoq Jonathan Motzfeldt oqarpoq.
Ataatsimiititaliami ilaasortat Islandimiipput maajip ulluisa 24-anit juunip ulluisa sisamaannut.
Islandimi nukissiuuteqarnikkut naalagaaffiup ingerlatseqatigiiffia Landsvirkjun Reykjavikimiittoq aamma pulaarneqarpoq, tassanilu erngup nukinga atorlugu inerisaaneq aluminiumillu tunisassiornermut innaallagissamik nioqquteqarneq pillugu islandimiut misilittagaat ataatsimiititaliamut ilisimatitsissutigineqarlutik.
- Islandip kangiani Alcoa-p aatsitsivissaanik sanaartornermi sanasunut ineqarfiugallarsimasoq aamma takuniarparput, paasisaqarfigeqaarpullu, Jonathan Motzfeldt oqarpoq.
