Inatsisartut ataatsimiititaliaat parnaarussiviliartoq
Nuummi 2014-imi matoqqasumik parnaarussiveqalernissaanut atatillugu piareersarneq angalanermi paasisassarsiorfigineqarpoq.
Herstedvesterimi parnaarussat aamma pinerluuteqarsimasunut inissiisarfimmi Horsensimiittumi parnaarussat kiisalu
Århusimi Risskovimi tarnimikkut napparsimasut inissinneqartarfianni uninngasut ataatsimiititaliamit pulaarneqarput.
Aammattaaq folketingimi inatsisit atortinneqarnerannut ataatsimiititaliaq ombudsmandilu pulaarneqarlutik.
- Nuummi matoqqasumik parnaarussiveqalertussaavoq, naalagaaffiullu pisussaaffigaa tamatuma naammassineqarnissaa, inatsisartuni Siumut sinnerlugu ilaasortaq Doris Jakobsen oqarpoq.
Ilumut matoqqasumik parnaarussiviliorneq naalagaaffiup tamakkiisumik akilerniarneraa, inatsisit atortinneqarnerannut ataatsimiititaliap erseqqissumik paaserusuppaa.
- Aningaasartuutit taamaasa naalagaaffiup akilerniarnerai qularaarput, taamaattumik tamanna qulakkeerniartussaavarput, Doris Jakobsen oqarpoq.
Aamma kalaallit illuutaat ataatsimiititaliamit pulaarneqarput.
- Pineqaatissinneqarsimasunut attaveqartartut sulinerminni atugassaritaat pitsaanerpaajunngitsut paasivagut,
Doris Jakobsen oqarpoq.