Inatsisartut Ataatsimiissapput
Inatsisartunut qinersinermi qinigaasut 31-t aqagu ullaap tungaani nalunaaqutaq aqqanermit siullermeerlutik ataatsimiissapput. Ataatsimiinnermi oqaluuserisassat 17-iussapput.
Ukiuni 26-ini Namminersornerulluta Oqartussaaffeqarnitsinni Inatsisartunut qinersisarnerit qulingiluassaat naammassereerpoq, nunatsinnillu aqutsineq ingerlaqqissaaq, ingerlaqqinnissaalu pissanganarpoq partiitoqqat pingasut Siumut Atassut Inuit Ataqatigiillu ukiut 26-it ingerlaneranni illuatungeriittarsimasut tamartumuuna naalakkersuisooqatigiilermata.
Inatsisartunngortut arnat 13-it angutillu 18-it Inatsisartut Ataatsimiittarfianni aqagu aqqanermut siullermeersumik katersuutissapput. Ataatsimiinnermi Inatsisartunut qinigaasimasut Qinigaanerup Misilinneqarnissaanut Ataatsimiititaliap inassuteqaataa naapertorlugu akuersissutigineqaqqaassapput, tamatumalu kingorna Inatsisartut siulittaasussaannik kiisalu Naalakkersuisut siulittaasussaannik toqqaasoqassaaq. Inatsisartut Ataatsimiititaliaani ataavartuni ilaasortassanik aamma qinersisoqassaaq.
Ataatsimiinnermi oqaluuserisassat 17-iupput.
Atuuffinnik Inatsisartunut attuumassuteqartunik inissitsiterinerup saniatigut Aappaagumut Inatsisartut aningaasaliissutissanut inatsiserigallagaata allannguutissaanik siunnersuutigineqartoq oqaluuserineqassaaq.
Allannguinissamik siunnersuut inuiaqatigiinni qinersineq pissutigalugu aalajangingassat utaqqisinnaanngitsut aningaasanik immikkoortitsivigineqarnissaannik imaqarpoq.
Paamiuni timmisartoqarfissaq, angalanermut tapiissutit, inuussutissarsiutit siuarsarnissaannut aningaasaliissutit suliffeqarnermillu nutarterineq, erngullu nukinga atorlugu nukissiorfinnut pilersaarutit kiisalu nunaqarfinnik pilersuinerup, Royal Arctic Bygde Service-p, januaarip allaqqaataaniit KNI-mut tuniunneqarnissaa, Aappaagu Aningaasanut Inatsisaagallartussamut allanguutissamik siunnnersuuteqarnermut tunngaviupput.
Aqagu Inatsisartut Naalakkersuisullu siulittaasussaannik qinersinerup saniatigut Inatsisartut ombudsmandissaannik aamma qinersisoqassaaq.