Inatsisartut ataatsimiinnissaat kinguartinneqarpoq
Tartupaluk pillugu New York-mi isumaqatigiinniarnissat Josef Motzfeldt-mit ingerlanneqassammata, Inatsisartut ukiaanerani ataatsimiinnissaat sapaatip akunneranik ataatsimik ippassaq kinguartinneqarpoq.
Demokraatit siulittaasuat Per Berthelsen oqarpoq, inatsisartut ataatsimiinnissaannik kinguartitsineq suliniarnermut sunniuteqarnavianngitsoq.
- Sapaatip akunnera ataasiinnaq kinguaattuussaagut, kinguartitsineq allamik siunertaqanngippat ajunngilaq, kingullertigulli Siumup iluani eqqissiviilliortoqarpoq, soorunami aamma taanna eqqarsaatigisimavara, Per Berthelsen oqarpoq.
Atassutip siulittaasua, Augusta Salling, isumaqarpoq ataatsimiinnissamik kinguartitsineq pisariaqanngitsoq. Aamma isumaqarpoq kinguartitsineq kingusippallaartoq. Naalakkersuisulli pisariaqartitsisimappata tusaatissatut tiguinnarnerarpaa.
Inatsisartut ataatsimiinnissaat Septembarip 23-ani aallartinneqassaaq.
