Inatsisartut upernaakkut ataatsimiinnerat marsip qulingiluaanni aallartippat, isarussat atuffasit atorluartariaqassapput – immaqalu aamma issiavik akisaasamik maavaaqqusertariaqassaaq.
Ukiormanna upernaakkut ataatsimiinnissamut ullut 22-t piffissaliunneqarsimapput – ullullu taakkua ingerlaneranni oqaluuserisassat 113-it oqaluuserineqassapput – aamma siunnersuutit arlallit kingullermik ataatsimiinnermeersut taasissutigineqassapput.
Oqaluuserisassat assigiinngitsorpassuarnut tunngasuupput. Ilarpassui ineqarnermut tunngasuupput, ilaatigut timersornerup filmiliornerullu aningaasaliiffigineqarnerunissaanik siunnersuutit, aamma juullip inuata inissisimaneranut – ilaatigut inuiaqatigiinnit aningaasalersorneqarnissaanut – tunngasoq.
Oqaluuserisassat pingaarutillit ilagaat, ilaatigut inuiaqatigiinni oqaluuserineqalereersoq – aamma eqqasuutigineqalereersoq – tassa peqqinnissamik ingerlatsinerup sinerissami nutaamik aaqqissuunneqarnissaanik siunnersuut.
Peqqinnissamut naalakkersuisup – Agathe Fontainip – nutaamik aaqqissuussiniarneq saqqummiutissavaa.
Angallanneq aamma piniartutut aalisartutullu inuussutissarsiutit – oqartoqarsinnaavoq ¬- aasiit oqaluuserineqassaqaat. Taava aamma kommunit nutaamik aaqqissuunneqarnissaat aalajangiiffigineqassaaq. Ataatsimiinnerup ulluani siullermi kommunit 18-iniit sisamaannanngortinneqarnissaannik Naalakkersuisunit siunnersuut Inatsisartut isummerfigissavaat.
Aammattaaq kalaallit oqaasii oqaluuserineqassapput – soorluttaaq kikkut tamat oqartussaaqataanerat oqaluuserineqassaaq.
Oqaluuserisassani allanalaartuni oqaatigineqareersutut Juullip Inua Inatsisartut oqaluuserissavaat – aamma akikinnerusumik mattassisoqarsinnaalernissaa oqaluuserineqassaaq.
Siunnersuutit 21-t naalakkersuisut siunnersuutigaat – taamalu akuerineqarnissaat ilimanaateqarluarluni. Siunnersuutit 80-it Inatsisartunut ilaasortat siunnersuutigaat.
Inatsisartut upernaakkut ataatsimiinnerat maajip aappaani naammassissaaq – ullut 22-t ataatsimeereerpata poorskimilu sulinngiffeqareerpata.