Inatsisartut ataatsimiinnertik ullumi naammassissavaat

Inatsisartut ukiaanerani ataatsimiinnerat ullumi naggaserneqassaaq.

Inatsisartut Kukkunersiuinermik Ataatsimiititaliaata isumaliutissiissutaa sapaatip akunnerata massuma ingerlanerani oqallisaatigineqarsimaqimmat ulloq ataatsimiiffissaq pissanngatigineqarsimaqaaq.

Naalakkersuisut siulittaasuata Hans Enoksenip aalisarnermut piniarnermullu siorna naalakkersuisuugallarnermi ingerlatsisimanini pillugu isumaliutissiissummi sakkortuumik isornartorsiorneqarpoq.

Aappagumut aningaasanut inatsisissaq ullumi aamma inissinneqartussaassaaq. Aningaasanut inatsisissap taasissutigineqarnissaa ippassaq kinguartinneqarpoq, ullumilu oqaluuserineqartussani kingullinngortinneqarluni.

Kinguartitsineq illuatungiliuttunit Demokraatinit qisuariarfigineqarpoq, naalakkersuisooqatigiit partiianni ilaasortanut kimigiiserfiginninnertut taaneqarluni.

Ilaasortat pineqartut naalakkersuisut siulittaasuannik Hans Enoksenimik tatiginninnginnermik taasisitsinermi tapersersuisinnaanissaat annilaanngatigineqartoq pissutaatinniarneqarluni.

Tamannali partiip Siumup politikkikkut oqaaseqartartuata Lars-Emil Johansenip akerlilerpaa.