Inatsisartut ataatsimiinnertik naggartaarlugu ullumi ulapissapput
Eqqissisimaaginnartoqassanngilarli, oqaluuserisassammi pingaaruteqartut arlallit suliarineqartussaapput.
Suliassallu uissuumminarnerit ilagaat Inatsisartut ataatsimiittarfittaassaat pillugu suliaq.
Demokraatit avaqqullugit amerlanerussuteqartut suliap ingerlateqqinnissaanut tunngavissatut aalajangiisoqarnissaa inassutigaat. Demokraatit isumaqarput aningaasat allanut atorluarneqarsinnaasut, aammali ataatsimiittarfiup mikivallaalersimanera nassuerutigalugu, Inatsisartunullu ilaasortat 31-nit 25-nut ikilisinneqarnerisigut tamanna aaqqiivigineqarsinnaasoq Demokraatit siunnersuutigaat.
Aammattaaq oqartussaasuni suliffeqarfinnilu peqquserluttuliortoqannginnissaa pissaanermillu atornerluisoqannginnissaa siunertaralugu pisortatigut kinaassutsimik ersersitsisuunngitsumik ilisimasamik ingerlatseqqiisinnaanermut aaqqiissuussinermik - aamma Whistleblowerimik taaneqartartumik - Nunatsinni eqqussisoqassanersoq aalajangiiffigineqartussaavoq.
Kiisalu aamma Suliniutinut angisuunut inatsit kinguaattoorfiusimasoq inaarutaasumik akuersissutigineqartussaavoq. Taamaaliornikkullu suliffeqarfiit London Miningitut Alcoatullu ittut tikilluaqquneqarsinnaanngussapput.
Tamakku Inatsisartut siulittaasuata Lars-Emil Johansenip Inatsisartut ukiakkut ataatsimiinnerat naammassisutut nalunaaruteqannginnerani ullormi ataatsimiiffiusumi kingullermi eqqartugassat ilagiinnarpaat.