Inatsisartut ataatsimiinnertik naammassivaat
Inatsisartuni ilaasortat qaammatini marlussunni ukiaanerani ataatsimiinnertik ippassaq naammassivaat juullisioriarsinnaanngorlutillu, naggataarutaasumillu oqallinnerminni aningaasanut inatsit aappaagumoortoq oqaluuseraat, naalakkersuisooqatigiillu amerlanerussuteqarnertik atorlugu akuersissutigalugu.
Aningaasanut inatsisip isumaqatigiinniutigineqarnerani pisut aalassassimaarutaasut ilagaat, aalisarnermut piniarnermullu naalakkersuisuusimasup Simon Olsenip parteeqamminik Ole Thorleifsenimik aningaasaqarnermut ataatsimiititaliami siulittaasutut taarsiinera.
Sermitsiami allaaserineqartut naapertorlugit, Simon Olsen naalakkersuisutut tunuassaguni aningaasaqarnermut ataatsimiititaliami siulittaasunngornissi piumasarisimavaa. Radioavisip paasisai naapertorlugit, Simon Olsen aningaasaqarnermut ataatsimiititaliami ilaasortaaqatiminit tamakkiisumik taperserneqanngilaq, taamaallaallu ilaasortat pingasut tunuliaqutarai, tassalu nammineq aamma Ruth Heilmann kiisalu Aqqalukasik Kanuthsen.