Inatsisartut ataatsimiinneri tamaakiisumik aallakaatinneqarsinnaasariaqarput
Inatsisartut oqallinnerisa internetikkut aallakaatinneqartalernissaat inatsisartut isumaliutigisariaqaleraat, nunatsinni tusagassiuutit Inatsisartunit ippassaq oqaluuserineqarmata, Inuit Ataqatigiinneersup Kuupik Kleistip siunnersuutigaa.
Kuupik Kleist isumaqarpoq, Inatsisartut oqallinneri Kalaallit Nunaata Radioatigut toqqaannartumik aallakaatinneqartartut nalaatsornerinnaavallaartut, innuttaasullu tusartinneqartarnerat ilaannakuusoq.
- Pingaarnersiuisoqarneq ajorpoq, suullu tusartinneqassanersut nalunaaquttamit aalajangersorneqartarput. Inatsisartuni ilaasortaq tunngavilersuivoq.
Internetikkut toqqaannartumik aallakaatitsisalernikkut oqallinnerit tamakkiisut ilanngunneqartalissagaluartut, KNR-ilu Inatsisartunit toqqaannartumik aallakaatitsissaaruni piffissaq allamut atorsinnaalissagaluaraa, Kuupik Kleist isumaqarpoq.
Inatsisartuni ilaasortaq aamma isumaqarpoq, Inatsisartut namminneq tusagassiiveqalernissartik isumaliutigisariaqaraat, taamaaliornikkut innuttaasut oqallinnernut aalajangiinernullu tusagaqartinneqarnissaat qulakkeerneqarniassammat.
