Inatsisartut ataatsimiinnerat pitsaanerusinnaagaluarpoq
- Suliffeqarfik Inatsisartut nunamut inatsisiliortuusut ini akimanerpaatut oqaluttarfillu akimanerpaatut taaneqartartoq isumaqarpunga oqaatsinik pissuserissaartutut nipeqartinneqarsinnaasunik ingerlatsiviulersinnaasuuppat tamatsinnut pitsaanerpaamik nalilerneqartariaqaraluartoq, Josef Motzfeldt oqarpoq.
Inatsisartuni oqaluttarfimmit oqaseqartarnermi pissuserissaartoqarsimanersoq aperineqarami ima akivoq:
- Ukiakkut ataatsimiinneq kingumut qiviassagaanni tamakkiisumik taama oqaatigineqarsinnaanngilaq.
Tamanna pitsaanerusariaqartoq Josef Motzfeldt isumaqarpoq:
- Uagut maani nunami kisiartaavugut mikrofuuni ammarlugu kikkunniilluunniit tamanit tusarnaarneqarsinnaasumik oqallinnermik ingerlatsisartut. Taamaalillutalu innuttaasut qanoq oqalliseriaaseqarsinnaanissaanni peqatigiiffimminni nunaqqatigiittut oqalliseriaaseqarnissaannut naleqqersuutit pingaaruteqartorujussui, Josef Motzfeldt oqarpoq.
Inatsisartut oqaluttarfianni allaanerusumik oqaluttoqartalernera Josef Motzfeldtip pissuteqartinnerarpaa:
- Inatsisartut katitigaanerat eqqarsaatigalugu kingullermik qinersisoqarnerata kingorna allanngorujussuarnikuupput. Inatsisartuni nutaaviit 17-18-iupput inissani 31-jusuni. Taamaammat taakku soorunami imminnut suleriaaseq inatsisartuunerlu nassaariniarsarisut nalunanngillat, Josef Motzfeldt oqarpoq.
Inatsisartuni ilaasortatoqqat aamma pisooqataasut Josef Motzfeldt isumaqarpoq.
- Maluginianngitsuugassaanngitsoq tassaavoq inatsisartunut ilaasortatoqqatut taaneqarsinnaasut malussarissorujussuummata. Inatsisartut nutaartaasa oqalliseriaaseq nutaajusoq sungiunniarsarisussaavaat. Taamaalilluni imminnut sungiunniarnissaminnut maannakkut periarfissaqarsimapput, Josef Motzfeldt oqarpoq.
Inatsisartut ataatsimiittarnerisa ilusaata allanngortinneqarnissaa oqallisigineqarpoq.
Siunnersuutigineqarpoq inatsisartut ukiumut marloriaannaratik ataatsimiittalissasut.
- Nassaarissagutsigu arlaat ataatsimeeriaaseq, tassaasariaqassajunnarsivoq immaqa ukiumut ataatsimiinnerit marluinnaajunnaarsillugit immaqa sivikinnerusumik pingasut-sisamariarluni ataatsimiittalernissaq isumaliutigineqartut ilagisinnaavaat, Josef Motzfeldt oqarpoq.
Josef Motzfeldtip eqqaamaqquaa, inatsisartunut ilaasortat inuinnaammata:
- Maluginianngitsuugassaanngilaq Nuummi nammineq najugaqartuulluni Nuup avataaninngaanneersut qaammatit marlunngulillaraangata angerlarsillattaalersartut, Josef Motzfeldt oqarpoq.
