Inatsisartut ataatsimiinnerat aallartissaaq

Inatsisartuni ilaasortat ukiakkut ataatsimiinnertik ullumi aallartissavaat.

Inatsisartut ataatsimiittarfiannut ilaasortat isertigatik ileqquusoq malillugu Hans Egedep illuani ullaakkorsioqatigeeqqaassapput.

Tamatuma kingorna kalaallisuulisaarlutik annoraaq qaqortulisaarlutillu Nuummi Annaasisitta oqaluffiani naalagiaqatigiissapput.

Naalakkersuisut siulittaasuat Hans Enoksen inatsisartut ataatsimiinnerat ammarlugu oqaaseqassaaq.

Oqalugiaatissaata oqaasertassai suli oqaluttuarisinnaanngikkallarpagut. Taamaattorli ilinniartitaaneq erngullu nukinga atorlugu nukissiuutissat aningaasaliiffigineqarnissaat eqqartorneqarniartut arlallit immaqa eqqoriarsinnaareerpaat.

Inatsisartut eqqissisimasumik ataatsimiinnissaat ilimanarpoq. Naalakkersuisooqatigiit aningaasanut inatsisissaattut siunnersuutertik amerlanerussuteqartunik akuerineqarnissaa neriuutigaat. Innuttaasut peqqissusaasa pilersaarusiorneqarnerat aamma pingaarutilittut naalakkersuisooqatigiinnit isigineqarpoq.

Inatsisartut novembarip qiteqqunnerata tungaanut ukiakkut ataatsimiissapput.