Inatsisartut ataatsimiinnerat aallartippoq

Inatsisartunngortut 31-iusut ukiuunerani ataatsimiinnertik ullumi nalunaaqutaq qulinut aallartissavaat. Ataatsimiinneq ulluni 17-ini sivisussuseqassaaq. Siumut, Atassut Inuit Ataqatigiillu Namminersornerullutik Oqartussaqarnerup oqaluttuarisaanerani siullermeerlutik inatsisartunut novemberimi qinersineqarmat naalakkersuisooqatigiilerput.

Oqaluuserisassanut ilaavoq - qinersisimaneq pissutigalugu kingusinaartariaqartoq – ukioq-mannamut Aningaasanut Inatsisissatut siunnersuut.

Ataatsimiinneq inatsisartut siulittaasuata tullianit siullermit Agathe Fontainimit ullumi ammarneqareerpat, ullormut oqaluuserisassat tullerissavaat Naalakkersuisut siulittaasuata ammaanersiornermi oqalugiaataa. Ataatsimiititalianut ataavartunut siunnersuisoqatigiinnut, nævninut sinniisoqarfinnullu ilaasortanik sinniisussaannillu kingorna matoqqasumik qinersineqassaaq.

Inatsisartut sapaatip akunnerini pingasuni marlunngornikkut, pingasunngornikkut tallimanngornikkullu inersuarmi ataatsimiittassapput, ullullu sinnerini ataatsimiititaliani partiillu gruppiini ataatsimiittassallutik.

Inatsisartut ataatsimiilernerat radiukkut toqqaannartumik aallakaatinneqassaaq.