Inatsisartut ataatsimiinnerannit

februaarip 17-at 2006 11:47

Inatsisartut ullut aappassaanni ataatsimiinnerat ammaanersiornermi oqillinnermik aallartinneqarpoq.

Naalakkersuisut siulittaasuata Hans Enoksenip ataatsimiinneq ammarlugu oqalugiaataa Inatsisartuni partiinit oqaaseqarfigineqarluni.

Siumut oqaaseqartuata Lars-Emil Johansen-ip oqaaseqarnermini Namminersulernissatsinnut alloriarnerit siulliit maanna pisariaqalernerarpai, tassunga atatillugu kalaallisut oqaatsitta pingaartinneqarnerulertariaqarnerat

Siumut oqaaseqartuata tikkuarpaa. Oqaatsitta atorneqarnerat pillugu erseqqarissumik malittarisassiortoqartariaqalerpoq. Pisortat sullissiviini oqaatsitta pingaarnertut atorneqalertariaqarput, pingaartumillu Inatsisartuni oqallittarnerup kalaallisuinnaq ingerlanneqartalertariaqalersoq Lars-Emil Johansen tikkuaavoq. Tassunga atatillugu erseqqissarpaa tamanna inatsisartuni ilaasortanik qallunaatuinnaq oqaluttunik uparuartuiniarnertut paasineqassanngitsoq, inuiaqatigiittulli aaqqissuussaanitsinni oqaatsitta tunngaviusumik atorneqalernissaat pisariaqalersoq Lars-Emil Johansen tunngavilersuivoq.

Qallunaat nunatsinnut tikittartut kalaallisut oqaatsinut ilinniarfeqarnikkut pitsanngorsaaffigineqartariqarnerat Lars-Emil Johansen aamma oqarpoq, Sisimiuni Oqaatsinut Ilinniarfiup Nuummi qallunaaqarfiunerpaasumi ilaqalernissaanik suliniuteqarnissamik kaammattuuteqarpoq.

Naalakkersuisut siulittaasuata aammaalluni oqalugiaataanut oqaaseqarnermini naalakkersuisooqataasut Atassut sinnerlugu oqaaseqartuat Augusta Salling naalakkersuisooqatigiinnut apeqquterpaalussuarnik saqqummiussaqarpoq.

Great Greenland pillugu naalakkersuisut qanoq pilersaaruteqarnersut Atassutip oqaaseqartuanit ilaatigut paaserusunneqarpoq. Augusta Salling erseqqissaavoq Great Greenlandimut atatillugu pisut Atassummit toqqissisimanartinneqanngimmata suliffeqarfik sukumiisumik misissuiffigineqartariaqartoq.

Canadamiit amersiat nunatsinni ameerutinut paarlaanneqartarsimannginnersut, sinneqartoorutaasumillu tuneqqinneqartarsimanersut qulaajarneqartariaqartoq Augusta Salling oqarpoq.

Tamatuma saniatigut Arctic Umiaq linep tunineqarneranut Atassut akerliusimasoq isumaqarpoq, naalakkersuisut aaqqiissutissanik iliuuseqartariaqartut angallannermi pissutsit massakkut atuuttut eqqarsaatigalugit.

Inuit Ataqatigiit danskit naalakkerusisunut kaammattuipput Jyllandspostenimi titartakkanut atatillugu utaqqatsissuteqaqqusilutik.

Tamatuma saniatigut puisit amii pillugit Danmarkimi oqallisilerneq eqqunngitsumillu tusagassiisimaneq pissutigalugu nunarput sakkortuumik avoqqarliteqartariaqartoq IA-p oqaaseqartua Kuupik Kleist oqaaseqarpoq.

Demokraatit isornartorsiuteqarput, allanngortiterinernut kiffartuussinermut ilinniartitaanermut meeqqanillu sumiginnaanermut tunngatillugu ilaatigut isornartorsiuteqarput.

Demokraatit tungaannit assigiimmik akeqartitsineq atorunnaartoq nukissiuuteqarnermo allanngortiterinerit aallartinneqartut naalakkersuisunit maana qarajarneqalersut, assersuutigaat naalakkersuisut tuaviussamik allanngortitsinerat Nuummi innuttaasut innaallagissamut aningaasartuuteqalernerannik kinguneqarsimasoq.

Kattusseqatigiit partiiat isumaqarpoq allaffissornikkut aningaasartuutikillisaanissamik illuatungaani naalakkersuisut oqalunnguaasaarlutik allaffissornikkut aningaasartuutikillisaasoqarneranut takussutaasinnaasunik aningaasanut inatsisissami ersettoqanngitsoq.