Inatsisartut ataatsimiikkunnaarallarput
Inatsisartut upernaakkut ataatsimiinnerat, ullunik sisamaannarnik amigaateqaleruttortoq Namminersorlutik Oqartussat illorsuaata oqoqalersimanera pillugu Inatsisartut ataatsimiittarfimmiissinnaajunnaarput.
Inatsisartut upernaakkut ataatsimiinnerminni oqaluuserisassaat maanna pingaarnersiorneqartariaqalersut, pingaannginnerillu aatsaat ukiaanerani ataatsimiinissamut ikkuneqqartariaqartut Inatsisartut siulittaasuannit Josef Motzfeldtimit oqaatigineqarpoq.
Oquk Namminersorlutik Oqartussaniilersimasoq, navianartuusimammat Sullivinnik Nakkutilliisut Namminersorlutik Oqartussat illorsuaata ilaat sukkanerpaamik matuvaat. Taamaattumillu aamma, Namminersorlutik Oqartussat illorsuaani sulisut ilaat sullivimminniit allamut nuunneqartariaqalersimapput.
Oqummik nassaarfigineqanngitsutuat tassaapput partiit allaffeqarfii.
Inatsisartut ataatsimiinnissaaraluat aqagu aqaguagulu unitsiinnarneqartoq, Inatsisartut siulittaasuannit Josef Motzfeldtimit oqaatigineqarpoq, sulilu sumi Inatsisartut ataatsimiinnertik nangissinnaaneraat naluneqarallarluni.
