Inatsisartut arsaaffilersaarutilerput
Siulersuisuni amerlanerusunik arnanik ilaasortaatitaqalernissaq Inuit Ataqatigiinniit siunersuutiginiarneqarpoq
Naak arnat ilinniagaqarluarnerusaraluartut siulersuisuni ikinnerussuteqartuarput.
Aalisartut aningaasarsiornerat pitsaanerulerniassammat tunitsiviit namminersortunngorsarneqarnissaat Kattusseqatigiit Partiianniit siunersuutigineqarniarpoq
Arsaattarfinnik ivigaasanik amerlanerusunik peqalernissaa Demokraatinit siunnersuutiginiarpaat. Kommunit tamakkerlutik ivigaasanik arsaattarfittaassasut sinnersuummi piumasarineqarniarpoq.
Siumumiit siunersuutigineqarniarpoq meeqqat aqqaneq-marluk ataallugit ukiullit imeruersaatinik eqeersaatitalinnik pisisinnaajunnaarnissaat, paasineqarsimammat meeqqat uummataat sukkanerusumik kassuttartoq imeruersaammik eqeernartutalimmik imersimagaangamik.
- Imeruersaatit eqeernartutallit sukkoqarpallaarneri koffeineqarpallaarnerallu pissutaalluni taama siunersuusiorpugut. Aamma ulluinnarni meeqqat takusarpagut meeqqat anitsiarfinni imaluunniit atuareernerup kingorna tamakkuninnga pisiniarfinni pisisinnaasartut. Taamaattumik meeqqat peqqissusaat illersorniarlugit taama siunersuusiorniarpugut, taama Siumiit Malik Berthelsen KNR-imut oqarpoq.
Kattusseqatigiit Partiiannit Inatsisartunut ilaasortaq, Knud Fleischer, siunnersuuteqarpoq Royal Greenland namminersortunngortinneqassasoq, suliffeqarfiup ukiuni kingullerni amigartoortarnera pissutaalluni. Knud Fleicher nangilluni ima oqarpoq.
- Kialuunniit takusinnaavaa aningaasarsiorfipput nunatta avataaniilersimammat. Uagut Kalaallit Nunaanni Royal Greenlandi tamatta pigaarput ullullu tamaasa akilersuiffigaarput. Kisianni ingerlataq nuannaarutigalugu oqaatigineqartartoq ullumanna tikillugu aamma aqagu suli innuttaasut akilersortuassavaat? Suliffeqarfik nammineerluni sinneqartoorutini ingerlatsineq ajormat, taama Knud Fleischer oqarpoq.
