Inatsisartut aqagumiit ataatsimeeqqilissapput
Nunatta iluani nunatsinnullu nussornerit aningaasaliiffigineqarsinnaalissagunarput.
Naalakkersuisut ukiup tullianut aningaasanut inatsimmi illoqarfimmi allami suliffittaartartut nussornerisa aningaasaliiffigisinnaanissaat periarfissiuunniarpaat.
Taamaaliornikkut naalakkersuisut neriuutigaat nunanit allanit suliartortitat ikilisarsinnaassallugit.
Inatsisartut upernaakkut ataatsimiinnerat aqagu nalunaaqutaq ataatsimut ammarneqassaaq. Inatsisartuni siulittaasup Jonathan Motzfeldtip sianeq sianaartissavaa inatsisartunilu ilaasortat 31-t tikilluaqqussallugit.
Aningaasaqarnermut naalakkersuisoq Josef Motzfeldt siulliulluni oqalugiassaaq. Taassuma 2006-imi aningaasaqarnikkut ingerlatsineq pillugu nalunaarut saqqummiutissavaa.
Naalakkersuisut nunatsinni suliniutigerusutaat tassani atuarneqarsinnaapput; soorlu ilinniartitaaneq, angallanerup aaqqissunneqarnera, nukissiuutit ineqarnermullu tunngasut 2020-p tungaanut suliniuteqarfigerusupput.
Nalunaarut qimerloorlugu takuneqarsinnaavoq arlalinnik naalakkersuisut anguniagaqarusuttut.
Assersuutigalugu nunatsinni suliffeqanngitsut illoqarfimmi allami suliffittaarnerminnut atatillugu nuunniarnerminni aningaasaliiffigineqartalernissaat naalakkersuisunit aappagu aningaasanut inatsimmi immikkoortitsivigineqarusupput.
Nalunaarummi Josef Motzfeldt allappoq: ”Misilittakkat takutippaat suliffiit taakku sulisunik tikisitanik akisuunik amerlanertigut inuttalerneqartartut naak sulisussaaq ujartorneqartoq nunami sumiiffimmi allami pissarsiarineqarsinnaagaluartoq”.
Nunaqavissut atorfeqarnerminnut atatillugu ineqartinneqarsinnaanngitsut, atorfininnerminnut atatillugu angalatinneqarsinnaanngitsut pigisallu nassiunnerinik akiliunneqarneq ajortut siunnersuut taanna akuerineqassappat illoqarfimmi allami suliffittaarnerminni ajornannginnerusumik aqqutissiuunneqartalissapput. Taamaalilluni nunani allani suliffeqanngitsunik tikerartitsisarneq pisariaarukkiartussagatinneqarpoq.
Naalakkersuisut siunnersuut taanna pillugu upernaap ingerlanerani KANUKOKA-mut attaveqarnissartik aalajangiussimavaat. Tamannalu 2007-imi aningaasanut inatsit aqqutigalugu piviusunngortinneqarsinnaassasoq ilimagineqarpoq.
