Inatsisartut aqagu naggataassapput

maajip 22-at 2006 10:33

Inatsisartut upernaaq manna ataatsimiinnerat aqagu naggataarneqassaaq, suullu aalajangiiffigineqassanersut qimerloorpavut.

Sisimiormiut biilerlutik Kangerlussualiartalissappat? Atuartut 9. klassimiit qummut atuarnersiuteqalissappat? Kommunalbestyrelsi nunaqarfinnilu aqutsisut ataatsimiititaliani ataatsimiinnissartik pillugu angalasariaaarutissappat telefonikkulli ataatsimeeqataasalerlutik? Apeqqutit paasissutissallu katillugit 29-iusut ullumi aqagulu inatsisartunut ilaasortanit isummerfigineqarlutillu aalajangiiffigineqassapput.

Demokraatiniit Palle Christiansen-ip Sisimiuneersup siunnersuutigaa ukiuni sisamani tulliuttuni 100 mio. koruunit nunaqarfinni isorliunerusunilu inissialiornissanut atorneqartussat Sisimiuniit Kangerlussuarmut aqqusinniornermut nuunneqassasut. Siullermeerneqarnerani siunnersuut naalakkersuisuniit isumaqatigineqanngilaq.

Inatsisartut ataatsimiinneranni aalajangiiffigisassat paasissutissiinerillu nittartakkami nanoq.gl-imi qimerloorneqarsinnaapput.