Inatsisartut aningaasaqarnermut ataatsimiititaliaani ilaasortat isumasioqatigiittut

Aningaasanut inatsisissatut siunnersuut nutaaq ataatsimiititaliamit ataatsimut misissorneqarlunilu oqallisigineqarpoq. Tamanna tunngavigalugu Naalakkersuisunut apeqquterpassuarnik saqqummiussinissani ataatsimiititaliap naatsorsuutigaa. Ataatsimiititaliat susassaqartut aningaasanut inatsisissatut siunnersuummut oqaaseqaataasa Aningaasaqarnermut Ataatsimiititaliap sulinerani ilanngunneqarnissaat siunertaralugu apeqqutit Inatsisartut ataatsimiititaliaannut saqqummiunneqarnissaat aamma naatsorsuutigineqarpoq.

Naalakkersuisut akissuteqaataat ataatsimiititaliallu susassaqartut ilanngussaat ilaatigut aningaasanut inatsisissatut siunnersuutip aappassaaneerneqarneranut Aningaasaqarnermut Ataatsimiititaliap isumaliutissiissusiornerani tunngavissaalluassapput aningaasaqarnermut ataatsimiititaliap siulittaasua Akitsinnguaq Olsen tusagassiuutunut nalunaaruteqarluni ilaatigut taamatut allappoq.

Inatsisartut partiivisa aningaasanut inatsit pillugu isumaqatigiinniarnissaannut tapertaassassasut ataatsimiititaliaq nalunaarpoq . Apeqqutit aningaasanut inatsisissatut siunnersuutip aappassaaneerneqarneranut Aningaasaqarnermut Ataatsimiititaliap isumaliutissiissutaanut ilanngullugit pisarnertut tamanut saqqummiunneqassapput. Ilulissaniinnermi Qaasuitsup kommuniata aningaasaqarnermut ataatsimiititaliaa angusaqarfiulluartumik ataatsimiititaliamit ataatsimeeqatigineqarpoq, tamatumani kommunip aningaasaqarnikkut inissisimanera aammalu kommunip 2010-mi aningaasaqarnerata ineriartorneranut naatsorsuutigisat oqallisigineqarlutik.

Tamatuma saniatigut ataatsimiititaliap takuniarpai Royal Greenlandip raajaleriffiutaa, Pædagogisk-Psykologiske Rådgivning (PPR) kiisalu Mathias Storchip aammalu Jørgen Brønlundip atuarfii. Takuniaanerit tamarmik paasissutissanik pissarsiffiulluartut inatsisartut aningasaqarnermut ataatsimiititaliaa tusagassiuutinut nalunaaruteqarluni taamatut allappoq.