Inatsisartut aningaasanik taama atuitigipput
Inatsisartunut ilaasortat sinniisuisa akissarsiaannut aningaasartuutit annikkilleriarnerpaapput. Inatsisartuni ilaasortat sinniisaannut akissarsiat siorna 106.000 koruuniupput.
Akissarsianut ataatsimiinnersiutinullu aningaasartuutit 2009-mit 5 millionit koruuninik ikileriarput, siorna 20,7 millionit koruuniullutik. Taakkua saniatigut ilasseqatigiinnermut tunissutinullu aningaasartuutit ikileriarsimapput.
Inatsisartunut ilaasortat angalasarnerat 2009-mut sanilliullugu annikillerianngilaq.
Naalakkersuinermik suliaqartut 2010-mi angalanerannut 3,3 millionit koruunit atorneqarput, 2009-mut sanilliullugu koruunit milliuunip affaanik amerlanerullutik.
Inatsisartuni ilaasortani angalanerpaapput Siumut sinnerlugu inatsisartuni ilaasortat, paasisassarsiorlutik angalanerminni 430.000 koruunit taakku atorpaat.
Siumut sinnerlugu inatsisartuni ilaasortaq, Akitsinnguaq Olsen, angalanernut, akunnittarfinni unnuisarnernut allanullu atuinermigut Inatsisartut aningaasaqarneranut siorna atuinerpaavoq, katillugit 88.940 koruuninik atuigami.
Akileraartartut akiligaannik angalanernut aningaasartuutinut atuinikinnerpaat tassaapput Demokraatinut ilaasortat, 46.000 koruunit taakku siorna atorpaat.
Inatsisartut ukiumoortumik nalunaarusiaani allassimavoq, Inatsisartut ataatsimiititaliaanni ilaasortat angalanerpaat tassaasut inuussutissarsiornermut ataatsimiititaliami ilaasortat, angalanermut 238.887 koruuninik siorna atuisut, ataatsimiititaliat allat sisamat angalanernut allanullu atuinngilluinnarsimallutik.
