Inatsisartut ammanerunissaannut siunnersuut itigartinneqarpoq

- Inatsisartut siulittaasoqarfiani ilaasortat angalanermut akunnittarfinnilu unnuisarnerannut aningaasanik 2015-ip aallartinneranit majip arfineq aappaata tungaanut qanoq atuitigisimanersut pillugit allagaatinik takunnissinnaatitaaneq aqqutigalugu paasiniarpara.

Radioaviisi taama qinnuteqareerluni Inatsisartut allattoqarfianut ippassaq akissutissarsivoq.

Inatsisartullu Paasitinneqarsinnaatitaaneq pillugu inatsimmut ilaatinneqanngimmata Radioaviisi qinnuteqaamminut itigartitaavoq.

Siunnersuut itigartinneqarpoq

Naalakkersuisut Paasitinneqarsinnaatitaaneq pillugu inatsimmut ullumi ilaatinneqarpoq, Inatsisartullu aamma tassunga ilanngunneqartariaqaraluartut, Demokraatininngaanneersoq Randi Vestergaard Evaldsen isumaqarpoq, Inatsisartunullu siunnersuutigalugu.

Siunnersuulli ippassaq aappassaaneerneqarmat itigartinneqarpoq.

Justus Hansen Inatsisartut siulittaasoqarfiani ilaasortaasoq taaseqataanngikkaluarluni, Demokraatit sinneri akuersipput.

Siumut, Inuit Ataqatigiit, Atassut aamma Partii Naleraq akuersinngillat.

Siunnersuutip siullermeerneqarnerani Inuit Ataqatigiit malittarisassat atuuttut iluaralugit oqarput.

- Ammanerusumik ingerlatsinissamut taajukkasi tamaavimmik malittarisassaqarput. Tunisinermi aningaasaq qanoq amerlatigisut atorneqarsinnaaneranut, nerisitsigaanni aningaasat qanoq atorneqarsinnaaneranut allaat, angalagaanni aamma qanoq pissuseqartoqarnissaanut allaat, tamaavimmik malittarisassaqarpoq. Taamaattumik malittarisassat soorunami tatigiunnaarsimagaanni siunnersuut taanna paasiuminarnerussaaq, Ane Hansen Inatsisartut oqallittarfianit oqarpoq.

Randi Vestergaard Evaldsenilli siunnersuutimi tatiginninnginnermut tunngassuteqanngitsoq erseqqissarpaa, ammanerunissamilli siunniussisuunerarlugu.

Aningaasartuutit takuneqarsinnaasut

Siunnersuummulli akerliusumik tunngavilersuinerpaasoq tassaavoq Inatsisartuni siulittaasoq Lars Emil Johansen.

Inatsisartut aningaasartuutai nalunaarusiami ukiut tamaasa saqqummersartumi atuarneqarsinnaasut, Lars Emil Johansenip ilaatigut ersersippaa.

- Ataatsimiisitalianut ilaasortat angalanerannut aningaasartuutit saqqummiunneqartarnissaat, taakkua ukiut tamaasa Inatsisartut siulittaasoqarfiani nalunaarutini immikkoorteqqissaarlugit saqqummiunneqartarput, Lars Emil Johansen oqarpoq.

Nalunaarusiamili Inatsisartut aningaasat sumut atorneraat allaqqanatik, aningaasartuutaalli katillugit qanoq amerlatiginersut taamaallaat allaqqasartut, Randi Vestergaard Evaldsen tusagassiuutinut nalunaarummi allappoq.

Inatsisartuni siulittaasoqarfiup ukioq kingulleq 575 000 koruuningajaat atorpai.