Inatsisartut Aalisarnermut ataatsimiititaliaata Karl Lyberth naammagiinnarsinnaajunnaalerpaa

Aalisarnermut ataatsimiititaliap siulittaasuata Nikolaj Jeremiassenip Siumumeersup parteeqatimi Aalisarnermut, Piniarnermut Nunalerinermullu Naalakkersuisup Karl Lyberthip Inatsisartunik suleqateqarnerup annertusarnissaanut sulissuteqarnissaanik kajumissaarlugu tamanut ammasumik allagaqarfigaa.
oktobarip 24-at 2013 04:41

Aalisarnermut ataatsimiititaliap arlaleriarluni siunissami aalisarneq pillugu Naalakkersuisup takorluugaanik saqqummiusseqqullugu qinnuiginikuuaa. Naammaginartumik nassuiaateqarnissaa suli utaqqivarput, Nikolaj Jeremiassen tusagassiofinnut nalunaaruteqarluni taama allappoq.

- Tamanna ajuusaarnarpoq, taamaallaammi aalisartunut ataasiakkaanut toqqissisimajunaartitsinngilaq, aammami Ataatsimiititaliap Naalakkersuisullu akornanni suleqatigiilluarneq innarlerpaa. Siunissami aalisarneq qanoq ineriartussanersoq aalisartup paasissallugu pisariaqartippaa. Tamatumani pineqarput pisassat agguaanneqartarnerat aamma malittarisassat nalunaarutillu allanngortarnerat, aalisarnermut ataatsimiititaliap siulittaasua allappoq.

Aalisarnermut ataatsimiititaliap pakatsinartippaa Naalakkersuisup Ataatsimiititaliamik akuutitsinerunissaq suleqateqarnerunissarlu annerusumik iliuuseqarfiginianngimmagu, Nikolaj Jeremiassen allappoq.

Taakku tunngavigalugit Ataatsimiititaliamik suleqateqarnerup annertusarnissaanik, tamatumanittaaq suliani aalisarnermut, piniarnermut nunalerinermullu attuumassuteqartuni piffissaatillugu Ataatsimiititaliap ilaasortaanik akuutitsinissap tusarniaasarnerullu isumannaarnissaannut Aalisarnermut ataatsimiititaliap Naalakkersuisoq kaammattorpaa, Nikolaj Jeremiassenip parteeqatiminut naveersinini taama naggaserpaa.