Inatsisartunut siunnersuutit

Ane Hansen-ip Inuit Ataqatigiinneersup ullumi Inatsisartut ullut arfineq pingajussaanni ataatsimiiffissaanni, umiatsiaararsorlutik aalisartut piniartullu silap allanngorarneranik pissuteqartumik inuussutissarsiutiminnik ingerlatsisinnaanngiffimminni annertussusileriikkamik ikiorsiissutinik pissarsisarnissamut periarfissinneqarnissaat anguniarlugu, Inatsisartuni siunnersuummik ullumi saqqummiussissaaq.

Ane Hansen-ip siunnersuuteqarpoq piniartut aalisartullu umiatsiaararsortut ajornartuuinnermi sulisartut pisinnaatitaaffiinut assingusunik annertussusileriikkamik ikiorserneqartalernissaat anguniarneqartariaqarsorigamiuk, kiisalu piniartut aalisartullu umiatsiaararsortut nungukkiartulinnginnissaat sulissutigineqartariaqarmat. Taamaammallu sulinermi atukkatigut periarfissaat pitsanngorsaavigineqartariaqarmata.

Siunnersuulli Naallakkersuisut akissuteqarnerminni tapersersinnaanngilaat, inatsisiliornerup siunertamut naapertuunnissaa isumannaatsumillu allaffissornikkut nakkutigineqarnissaa eqqarsaatigalugit ajornartorsiutaasinnaanissaa naatsorsuutigineqarmat. Aamma suliffeqanngikkallarnermi ajunngitsorsiassaqartitsisoqalissappat aningaasartuutitigut sunniutissai qanoq issanersut takorlooruminaatsinneqarmata.

Ane Hansen-ip siunnersuutaata saniatigut aamma Isak Davidsen Siumumeersoq oqallisissiaqarpoq, nunatsinni aalisartut piniartullu umiatsiaaqqanik angallatillit umiatsiaaraat EU-p piumasaqaatai tunngavigalugit atoqqusaajunnaassappata, nunatsinni qinikkanit naalakkersuisunillu piareersimaffigineqarnersoq umiatsiaaqqanik taarsersuisoqarnissaannik.

Siunnersuutit aalisartunut umiatsiaararsortunullu tunngasut saniatigut, siunnersuutit marluk utoqqalinersianut tunngapput. Ruth Heilmann-ip Siumumeersup siunnersuutigaa, utoqqalinersiat qaffanneqarnissaat, Atassummiillu aamma siunnersuutigineqarpoq aningaasartuutit aalajangersimasut akilerneqareernerini utoqqalinersiat assigiimmik minnerpaaffeqalernissaaat.