Inatsisartunut qinersisoqarsinnaanera eqqarsarnartoqarpoq
Naalakkersuisut siulittaasuata Hans Enoksenip Siumumi siulittaasutut qinigaaqqinngitsoornissani ernummatigigamiuk inatsisartunut qinersisoqaratarsinnaaneranik siorasaarivoq. AG-mi aaqqissuisoq Laila Ramlau Hansen taama naliliivoq, nangipporlu: - Politikki ajunngitsumik ingerlasoq Hans Enoksen oqaluppoq, kisiannili imminut illersorniarluni issiavimmilu tassaniiginnarniarluni siorasaarivoq. Tamanna qinersisartunit eqqumiigineqassaaq, Siumumilu ataatsimeersuaqataasut assut eqqarsaatigiumaarpaat siulittaasussaminnik qinersinnginnerminni, AG-mi aaqqissuisoq Laila Ramlau Hansen oqarpoq.
Inatsisartunut qinersisoqaratarsinnaanerannik oqalunneq Inuit Ataqatigiit tungaaninnganniit uggorineqarpoq.
IA’p siulittaasuata Josef Motzfeldtip oqaatigaa ikerinnakkut qinersisoqassagaluarpat uggoralugu, naalakkersuisooqatigiinnermut isumaqatigiissut ukiakkut 2003-mi atsiorneqartoq, ukioq manna januaarip aqqaneq-aappaanni tapiliussamik isumaqatigiissummik ilaneqarmat.
Siumumi siulittaasussarsiorneq oqaaseqarfigerusunngilaa, neriuutigaluguli Siumumi siulittaasussarsiorneq eqqissisimasumik torersumillu ingerlanneqarumaartoq.
Siulittaasussarsiornerlu illua’tungiliuttunissaaq akuliuffigineqarumanngilaq.
Demokraatini siulittaasoq Per Berthelsen aamma Siumumi pisut pillugit oqaaseqarumanngilaq, naatsumilli ima oqarpoq: Meeqqerivimmut taamaattumut akulerunnianngilanga.
Atassutip siulittaasua Augusta Salling oqarpoq Hans Enoksenip qinersinissamut siorasaarinera Atassutikkunnik ilanngussinerusoq.
- Siumukkut siulittaasussarnerat akuliuffiginianngilarput. Ajornartorsiut tamanna Siumukkut nammineq aaqqikkumaarpaat, Augusta Sallin oqarpoq.
Siulittasussamik qinersinissaq aqagu pissaaq, Hans Enoksenillu saniatigut Jørgen Wæver Johansen aamma Godmand Petersen qinigassanngortipput.